İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 122 Hüküm no: 86 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa ile Hayrullah Ağa’nın uhdelerinde bulunan berber gediği hisselerinden bir kısmını Emine Hanım’a sattıkları Berber Zikri âtî gedik âlâtının nısf hisse-i şâyi‘asının bâ-hüccet-i şer‘iye mâliki Karasulu Hafız Süleyman Ağa b. el-Hâc Mehmed nâm kimesne savb-ı şer‘-i enverden mezûnen irsâl olunan kâtib es-Seyyid Ahmed Rıza Efendi’nin mahmiye-i İstanbul’da Uzunçarşı başında vâki‘ Kilithanı denmekle arîf han derûnunda zeyl-i vesîkada muharrerü’l-esâmî Müslimîn huzûrlarında akdeylediği meclis-i şer‘de hademe-i hâssa mülâzımlarından gedik-i mezkûrun âhar nısf hisse-i şâyi‘asının mâliki Mahmud Ağa b. Hüseyin nâm kimesnenin li-ebeveyn er karındaşı ve tarafından husûs-ı âtîde vekîl olduğu sahtiyân tüccârından Hayrullah Ağa b. İbrahim ve Mustafa Ağa b. el-Hâc Mehmed nâm kimesneler şehâdetleriyle ber-nehc-i şer‘î sâbit olan hademe-i hâssadan İbrahim Edhem Ağa b. ( ) nâm kimesne hâzır olduğu hâlde işbu bâ‘isetü’l-vesîka Emine bt. Abdullah nâm hatun tarafından husûs-ı âtîde tasdîka vekîl olduğu Mehmed Salim Efendi b. el-Hâc Mehmed nâm kimesne mahzarında ikrâr-ı tâm ve takrîr-i kelâm edip mahmiye-i mezbûrede Lütfü Paşa’da karakolhâne karşısında Başmuhâsebe’de Berber Ali Usta ismine mukayyed ve mu‘teber muhterik bir bâb berber dükkânı derûnundan müstahlas beyne’l-esnâf gedik ta‘bîr olunur beş ustura ve bir kayış ve bir mikrâs ve sâir âlât-ı lâzıme-i ma‘lûme ber-vech-i muharrer benimle müvekkil-i mezbûr Mahmud Ağa’nın bi’l-münâsafe yedimizde emvâlimiz olmağla hâlâ biz ber-vech-i muharrer mâlikler olduğumuz âlât-ı gedik-i mezkûru altı sehm i‘tibârıyla ikişer sehmden dört sehmini yedimizde ibkā etmemizle mâ‘adâ birer sehmden cem‘an iki sehmini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mezbûre Emine Hatun’a dört yüz otuz guruşa bey‘ ü temlîk ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr dört yüz otuz guruşu benimle müvekkil-i mezbûra teslîm eylediğinde biz dahi yedinden tamâmen ve kâmilen ahz u kabz ve bi-kadri’l-hısas beynimizde iktisâm etmemizle mebî‘-i mezkûrun tağrîr ve gabnine müte‘allika âmme-i da‘vâdan müvekkile-i mezbûrenin zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik ba‘de’l-yevm âlât-ı gedik-i mezkûrun ber-i‘tibâr-ı merkūm birer sehmden ancak iki sehminde benimle müvekkil-i merkūm Mahmud Ağa’nın alâka ve medhalimiz kalmayıp müvekkile-i mezbûre Emine Hatun’un emvâl-i müşterâtı ve hakk-ı sırfı olmuşdur dedikde gıbbe’t-tasdîki’ş-şer‘î vâki‘ hâli kâtib-i mûmâ-ileyh mahâllinde ketb ü tahrîr ve ma‘an meb‘ûs ümenâ-i şer‘den Mahmud Raşid Efendi b. Ali ve Muhzır Müezzinzâde Molla Halil b. Süleyman ile meclis-i şer‘-i şerîfe gelip alâ-vukū‘ihî inhâ ve takrîr etmeğin mâ vaka‘a [bi’t-taleb ketb olundu] Fî 17 Za sene 12[46] Şuhûdü’l-hâl: Kethüdâvekîli el-Hâc İbrahim Ağa, Şeyhî Mustafa Efendi, Du‘âcı İsmail Efendi, Kâtib es-Seyyid el-Hâc Abdurrahman Efendi, Yiğitbaşı es-Seyyid el-Hâc Mehmed Nuri Ağa, Köşe Ustası el-Hâc Mehmed Ârif Usta.