İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 123 Hüküm no: 87 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan ve kız kardeşleri ile annesinin uhdelerinde bulunan bakkal gediği hisselerini Vasil ve Ligor’a sattıkları Bakkāl Âsitâne-i aliyye’de vâki‘ bakkāl tâifesinden kendi nefsinden asıl ve anası ve li-ebeveyn kız karındaşları olup vilâyet-i Anadolu’da Niğde kasabasında mütemekkineler Marya bt. Tursun ve Despino ve Anaştaşya bintey el-hâlik Bakkāl Kiryako nâm Nasrâniyeler taraflarından husûs-ı âti’l-beyânda vekîlleri olduğu eşhâs-ı mersûmâtı bilir Bakkāl Krasol v. Sava ve Toma v. Abraham nâm zimmîler şehâdetleriyle ber-nehc-i şer‘î sâbit olan İstefan nâm zimmî meclis-i şer‘-i hatîrde yine tâife-i mersûmeden işbu hâmilü’r-rakīm Ligor ve Vasil veledey İlya nâm zimmîler muvâcehelerinde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûre hısnı ebvâbından Odunkapısı [17a] hâricinde abacılar dükkânları karşısında kâin Kantarcıoğlu dükkânına muttasıl Hınnacı dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla doksan sehmi diğer Ligor zimmînin ve mâ‘adâ otuz sehmi dahi akd-i âti’z-zikrin sudûruna değin bâ-hüccet-i şer‘iye benimle anam ve kız karındaşlarım ve müvekkilelerim mersûmâtdan her birimizin yedimizde babamız hâlik-i mersûmdan mevrûs mülkümüz olmağla gedik-i mezkûrdan ben ve anam ve kız karındaşlarım ve müvekkilelerim mersûmâtın ber-minvâl-i muharrer mâlikeler olduğumuz hisse-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekimiz mersûmun izniyle mersûmâta bin yedi yüz elli guruşa bi’l-asâle ve bi’l-vekâle bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl ve semen-i mezkûr bin yedi yüz elli guruşu bana tamâmen def‘ ü teslîm ben dahi yedlerinden bi’l-asâle ve bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fî-mâ ba‘d gedik-i mezkûrun hissesinde benim ve anam ve kız karındaşlarım mersûmâtın aslâ ve kat‘â alâka ve medhalimiz kalmayıp müşteriyân-ı mersûmân Ligo[r] ve Vasil zimmîlerin iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 11 Za sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Kabzımâl Dimitri, Yazıcı Filibos, Ustabaşı İsak, Ustabaşı Kiryako.