İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 124 Hüküm no: 88 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Hüseyin ve ortaklarının uhdelerinde bulunan gedik hisselerini Simyon ve Zaharya’ya sattıkları Bakkāl Kaydı ihrâc-şüd Fî 29 Muharrem sene 1280 Mahmiye-i İstanbul’da Avratpazarı kurbünde Cerrâhpaşa mahallesinde sâkin bakkāl esnâfından es-Seyyid Hüseyin b. es-Seyyid İbrahim nâm kimesne ile vilâyet-i Anadolu’da Nevşehir ma‘a Ürgüp kasabasında mütemekkin Bakkāl Eftim v. Vasil nâm zimmînin sulbî kebîr oğlu ve tarafından husûs-ı âti’l-beyânda vekîl olduğu Nikola v. Dimitri ve Bakkāl İstavri v. Luka nâm zimmîler şehâdetleriyle ber-nehc-i şer‘î sâbit olan Lefter nâm zimmî ve yine kasaba-i mezkûrede mütemekkin Bakkāl Yani v. Mosail nâm zimmî tarafından husûs-ı âti’z-zikrde vekîl olduğu şâhidân-ı mersûmân şehâdetleriyle ber-nehc-i şer‘î sâbit olan diğer İstavri v. İstirat[i] nâm zimmîden her biri meclis-i şer‘-i münîrde yine esnâf-ı mersûmeden işbu hâmiliyyü’r-rakīm Simyon v. Apostol ve Zaharya v. Luka nâm zimmîler muvâcehelerinde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûre hısnı ebvâbından Kumkapı dâhilinde Nişancı Atîk Mehmed Paşa Hamamı ittisâlinde kâin İbrahim Ağa dükkânı denmekle arîf bir bâb bakkāl dükkânı ve ona merbût bir bâb mağaza derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmişer sehm i‘tibârıyla otuz sehmi merkūm es-Seyyid Hüseyin benim ve altmış sehmi vekîl-i mersûm Lefter zimmî babam ve müvekkilim mersûm Eftim zimmînin ve otuz sehmi vekîl-i mersûm diğer İstavri zimmî müvekkilim mesfûr Yani zimmînin akd-i âti’z-zikrin sudûruna değin bâ-hüccet-i şer‘iye yedlerimizde mülkümüz olmağla biz gedik-i mezkûrlardan hisse-i mezkûreleri tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûmân Simyon ve Zaharya zimmîlere ale’l-iştirâki’s-seviyy sekiz yüz guruşa bi’l-asâle ve bi’l-vekâle bey‘ ü temlîk ve teslîm eylediğimizde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr sekiz yüz guruşu mersûmân bize tamâmen def‘ ü teslîm ve biz dahi yedlerinden bi’l-asâle ve bi’l-vekâle ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fî-mâ ba‘d gedik-i mezkûrda merkūm es-Seyyid Hüseyin benim ve vekîlân-ı mesfûrân dahi müvekkillerimiz mersûmânın aslâ ve kat‘â alâka ve medhallerimiz kalmayıp müşteriyân-ı mersûmân Simyon ve Zaharya zimmîlerin iştirâken mülk-i müşterâları ve hakk-ı sırfları olmuşdur dediklerinde gıbbe’t-tasâduki’ş-şer‘î [mâ vaka‘a bi’t-taleb ketb olundu] Fî 15 Za sene 1246 Şuhûdü’l-hâl: Eş-şâhidûnü’s-sâbikūn