İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 125 Hüküm no: 89 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mülazım Mehmed Ağa’nın uhdesindeki manav gediği hisselerini hanımı Şerife Emine’ye sattığı Manav mübâya‘ası Mahmiye-i İstanbul’da Kabasakal mahallesinde sâkin asâkir-i mansûre-i Muhammediye’den Mülâzım Mehmed Ağa b. Hasan tarafından husûs-ı âti’l-beyânda ikrâr ve takrîre vekîl olduğu es-Seyyid Hüseyin b. es-Seyyid Ali ve Süleyman b. Osman şehâdetleriyle sâbit olan diğer Mehmed Ağa b. Hasan meclis-i şer‘-i şerîf-i enverde müvekkil-i merkūmun zevce-i menkûhası işbu bâ‘isetü’l-vesîka zâtı mu‘arrefe Şerife Emine Hatun bt. Mustafa mahzarında bi’l-vekâle ikrâr-ı tâm ve takrîr-i kelâm edip müvekkilim merkūm mahmiye-i mezbûrede Şeyh Ebulvefâ kurbünde Mollahüsrev mahallesinde kürkçü ve sebzeci dükkânları beynlerinde kâin bir bâb manav dükkânı derûnunda mevcûde beyne’l-esnâf gedik ta‘bîr olunur bir kantar ve bir terâzî ma‘a derâhim ve bir piştahta ve bir akçe tahtası ve sâir âlât-ı lâzıme-i ma‘lûme yüz yirmi sehm i‘tibârıyla kırk sehmi Ahmed Ağa’nın ve yirmi sehmi Memiş Ağa’nın ve on beş sehmi Hasan Ağa’nın ve on beş sehmi es-Seyyid Hüseyin Ağa’nın ve mâ‘adâ otuz sehmi akd-i âti’z-zikrin sudûruna değin benim bâ-hüccet-i şer‘iye yedimizde [17b] mülkümüz olmağla gedik-i mezkûrdan ben ber-minvâl-i muharrer mâlik olduğum hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müştereklerim izinleriyle zevcem mezbûreye sekiz yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr sekiz yüz guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrun hisse-i şâyi‘asında benim aslâ ve kat‘â alâka ve medhalim kalmayıp müşteriye-i zevcem mezbûre Şerife Emine Hatun’un mülk-i müşterâsı ve hakk-ı sırfı olmuşdur dedi dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 18 Za sene 1246 Şuhûdü’l-hâl: Bölükbaşı İbrahim Ağa, Kethüdâ-i muhzırân İsmail Ağa, Odacı Hüseyin Çelebi ve gayruhum.