İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 126 Hüküm no: 90 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan’ın babasından intikal eden manav gediği hisselerini Vasil v. Aleksi’ye sattığı Manav mübâya‘ası Âsitâne-i aliyye’de vâki‘ manav tâifesinden olup bundan akdem hâlik olan Yorgi v. Yasef zimmînin verâseti zevce-i metrûkesi Marya ve sulbiye kızı Anaştaşya Nasrâniyeler ve sulbî kebîr oğlu Yuvan zimmîye münhasıra ve mesele-i mîrâsları yirmi dört sehmden olup sihâm-ı mezbûreden üç sehmi zevce-i mersûmeye ve yedi sehmi kızı mesfûreye ve on dört sehmi oğlu mersûma isâbeti tahakkukundan sonra verese-i mersûmeden ibn-i mersûm Yuvan zimmî meclis-i şer‘-i hatîrde tâife-i mersûmeden işbu hâmilü’r-rakīm Vasil v. Aleksi zimmî muvâcehesinde bi’l-verâse ikrâr-ı tâm ve takrîr-i kelâm edip mahmiye-i mezbûre hısnı ebvâbından Zindan Kapısı hâricinde Çardakönü nâm mahâlde karakolhâne ittisâlinde kâin bir bâb manav dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Abdurrahman’ın ve otuz sehmi Dimitri zimmînin ve otuz sehmi babam ve mûrisimiz hâlik-i mersûmun ile’l-helâk yedinde mülkü ve ba‘de-helâkihi ber-tashîh-i mezkûr benimle anam ve kız karındaşım mersûmetâna mevrûs oldukdan sonra gedik-i mezkûrdan ben ber-tashîh-i mezkûr mâlik olduğum hisse-i mezkûremi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve bâ-izn-i şürekâ mersûm Vasil zimmîye sekiz yüz guruşa bi’l-verâse bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr sekiz yüz guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d hisse-i mezkûrede benim aslâ ve kat‘â alâka ve medhalim kalmayıp müşteri-i mersûm Vasil zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 24 Za sene 1246 Şuhûdü’l-hâl: Bölükbaşı İbrahim Edhem Ağa, Odacı Hüseyin Çelebi. Usta Yuvan v. Mosail, Manav Dimitri v. Anaştaş.