İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 127 Hüküm no: 91 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marya’nın uhdesindeki bakkal gediği hisselerini İstefor v. Todori’ye sattığı Bakkāl Vilâyet-i Anadolu’da Kayseriye kazâsına tâbi‘ İncesu kasabasında mütemekkine Marya bt. Atam nâm Nasrâniye tarafından husûs-ı âti’l-beyânda vekîl olduğu şahs-ı mersûmeyi bilir Bakkāl İsak v. Kiryako v. Vasil nâm zimmîler şehâdetleriyle ber-nehc-i şer‘î sâbit ve sübût-ı vekâletine hükm-i şer‘î lâhık olan Bakkāl Nikola v. İstefan nâm zimmî meclis-i şer‘-i hatîrde işbu hâmilü’r-rakīm Bakkāl İstefor v. Todori nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Parmakkapı nezdinde boyacı dükkânı karşısında kâin Bozacı Mehmed Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla kırk beş sehmi mesfûr İstefor zimmînin ve kırk üç buçuk sehmi Bakkāl Mina zimmînin ve yirmi iki sehmi Makrine Nasrâniyenin ve mâ‘adâ dokuz buçuk sehmi dahi akd-i âti’z-zikrin sudûruna değin müvekkilem mersûme Marya Nasrâniyenin bâ-hüccet-i şer‘iye yedlerinde mülkleri olmağla ben gedik-i mezkûrdan müvekkilem mersûmenin ber-minvâl-i muharrer mâlike olduğu dokuz buçuk sehm hissesini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i [vâhide] ile mersûm İstefor zimmîye altı yüz kırk dört guruşa bi’l-vekâle bey‘ u teslîm [temlîk] ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl edip semen-i mezkûr altı yüz kırk dört guruşu bana tamâmen def‘ ü teslîm ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-vekâle ve bi’l-asâle ibrâ-i âmm-ı sahîh-i şer‘î ile ibrâ ve iskāt eyledik fî-mâ ba‘d gedik-i mezkûrun dokuz buçuk sehm hisse-i şâyi‘asında müvekkilem mersûme Marya Nasrâniyenin aslâ ve kat‘â alâka ve medhali kalmayıp müşteri-i mersûm İstefor zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 21 Za sene [1]246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Kabzımâl Dimitri, Yazıcı Filibos, Ustabaşı İsak, Bakkāl Nikola, Bakkāl İstavri.