İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 128 Hüküm no: 92 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalband Abdullah Ağa’nın uhdesindeki nalband gediği hisselerini İsmail Ağa’ya sattığı Na‘lband mübâya‘ası Mahmiye-i İstanbul’da Aksaray kurbünde Bostancıbaşı Abdullah Ağa mahallesinde sâkin na‘lband esnâfından Abdullah Ağa b. Osman meclis-i şer‘-i münîrde esnâf-ı merkūmeden işbu bâ‘isü’l-kitâb İsmail Ağa b. el-Hâc ( ) mahzarında ikrâr-ı tâm ve takrîr-i kelâm edip mârru’z-zikr Aksaray kurbünde Muradpaşa mahallesinde arabacılar dükkânları hilâlinde kâin bir bâb na‘lband dükkânı derûnunda mevcûde beyne’l-esnâf gedik ta‘bîr olunur iki örs ve dört mıhçın ve iki na‘lçın ve iki törpü ve iki tahra ve bir kantar ve dört santıraç ve bir çekiç ve sâir âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye müstakıllen yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile beş yüz guruşa merkūm İsmail Ağa’ya bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr beş yüz guruşu tamâmen bana def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i merkūm İsmail Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 15 Za sene [1]246 Şuhûdü’l-hâl: Kethüdâ Mehmed Ağa, Mütevellî Hüseyin Ağa, Unkapanı’nda İbrahim Ağa, Atpazarı’nda İsmail Usta, Deve Hanı’nda Osman Usta, Yiğitbaşı el-Hâc Hasan ve gayruhum.