İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 129 Hüküm no: 93 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despino ve kız kardeşlerine babalarından intikal eden bakkal gediği hisselerini Aci Foti’ye sattıkları Bakkāl Vilâyet-i Rumeli’de Yenişehir-i fener nevâhîsinden Ağrafe nâhiyesine tâbi‘ İ[s]pilye karyesinde mütemekkineler Efendo [ve] Despino ve Kalo benât Bakkāl Tanaş v. Yani nâm Nasrâniyeler taraflarından husûs-ı âti’l-beyânda vekîlleri olduğu şahs-ı mersûmâtı bilir Bakkāl Abraham v. Dimitri ve Bakkāl Yani v. Kiro nâm zimmîler şehâdetleriyle ber-nehc-i şer‘î sâbit olan Bakkāl Yorgaki v. Aleksi nâm zimmî meclis-i şer‘-i hatîrde bakkāl tâifesinden işbu hâmilü’r-rakīm Aci Foti v. Togodoş nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Ağaçkakan kurbünde kâin Abdi Ağa dükkânı denmekle ma‘rûf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla kırk yedi sehmi Kiro zimmînin ve kırk sehmi Dimitri zimmînin ve medde‘â [mâ‘adâ] otuz üç sehmi dahi akd-i âti’z-zikrin sudûruna değin müvekkilelerim mersûmâtın yedlerinde ırsen ve şirâen mülkleri olmağla gedik-i mezkûrdan müvekkilelerim mersûmâtın ber-minvâl-i muharrer mâlikeler oldukları hisselerini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekleri izinleriyle mersûm Aci Foti zimmîye yedi yüz guruşa bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr yedi yüz guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm hisse-i mezkûrede müvekkilelerim mersûmâtın alâka ve medhalleri kalmayıp mersûm Aci Foti zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 5 Za sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Ananosti, Ustabaşı İsak, Ustabaşı Yani, Ustabaşı Nikola, Yazıcı Filibos