İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 130 Hüküm no: 94 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruveyde Hanım ile Dimo ve kardeşleri arasındaki gedik ve kira ücretlerinde çıkan anlaşmazlığın giderildiği Bakkāl gediğinin ücret ve gediğine dâir ibrâ Mahmiye-i İstanbul’da Sultanahmed Câmi‘-i şerîfi civârında Nahilbend mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Ruveyde bt. Hafız Mehmed nâm hatun meclis-i şer‘-i münîrde bakkāl tâifesinden işbu bâ‘isü’r-rakīm Dimo v. Yorgi nâm zimmî muvâcehesinde ikrâr-ı tâm ve takrîr-i kelâm edip mesfûr Dimo zimmî ile karındaşları gāibân ani’l-meclis Yani ve Hıristo zimmîlerden her biri mârru’z-zikr Nahilbend mahallesinde kâin el-Hâc İbrahim Ağa dükkânı denmekle şehîr bir bâb bakkāl dükkânında gedik sâhipleri oldukları hâlde bakkāllık ticâretiyle mütemekkinler ve dükkân-ı mezkûra merbût Cebecibaşı mağazası denmekle ma‘rûf bi’l-icâreteyn mutasarrıfe olduğum bir kıt‘a mağazada dahi kezâlik gedik mâliki olarak ücret-i ma‘lûme ile müstecirler olmalarıyla ben bundan mukaddem zimmiyyûn-ı mesfûrûn ile mağaza-i mezkûrenin ücret ve gediğine dâir nizâ‘ ve husûmete ibtidâr etmişidim el-hâletü hâzihî benim mersûm Dimo ve karındaşları gāibân-ı mesfûrân Yani ve Hıristo zimmîler zimmetlerinden mağaza-i mezkûrenin ücret ve sâir cihetden bir akçe ve bir habbe alacak hakkım olmayıp bi’l-cümle husûs-ı mezkûra ve işbu târîh-i vesîkaya gelince sâir cemî‘ hukūk-ı şer‘iyeye müte‘allika âmme-i da‘vâdan mesfûr Dimo ve karındaşları gāibân-ı mersûmân Yani ve Hıristo zimmîlerin zimmetlerini ibrâ-i âmm-ı sahîh-i şer‘î ile kabûllerini hâvî ibrâ ve iskāt eyledim dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 8 Za sene 1246 Şuhûdü’l-hâl: Pazarbaşı Süleyman Ağa, Teberdârlıkdan muhrec Halil Efendi, Muhzırlar Kethüdâsı İsmail Ağa, Teberdâr el-Hâc Ömer Ağa b. İbrahim.