İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 130 Hüküm no: 95 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeytinyağcı Abdürrezzak Ağa’nın uhdesindeki attar gediğini Ali Ağa’ya sattığı Tahmisönü’nde attâr Mahmiye-i İstanbul’da Küçükpazar kurbünde Hızırbey mahallesinde sâkin Zeytinyağcı Abdürrezzak Ağa b. el-Hâc Mehmed meclis-i şer‘-i şerîf-i enverde na‘lıncı esnâfından işbu bâ‘isü’l-kitâb Ali Ağa b. Mehmed mahzarında ikrâr-ı tâm ve takrîr-i kelâm edip mahmiye-i mezbûrede Tahmisönü nâm mahâlde Attâr Kabataşlı Nedim Ağa ve Paşalı Hüseyin Ağa dükkânları beynlerinde kâin bir bâb attâr dükkânı derûnunda mevcûde beyne’l-esnâf gedik ta‘bîr olunur bir peşkûn ve bir terâzî ma‘a derâhim ve bir akçe tahtası ve sâir âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye yedimde müstakıllen mâlım ve mülküm olmağla ben ber-minvâl-i muharrer mâlik olduğum âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Ali Ağa’ya üç bin dokuz yüz elli guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr üç bin dokuz yüz elli guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d âlât-ı muharrere-i mezkûrede benim aslâ ve kat‘â alâka ve medhalim kalmayıp müşteri-i merkūm Ali Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 26 Za sene 1246 Şuhûdü’l-hâl: Na‘lıncılar Kethüdâsı Mustafa Ağa b. Mehmed, es-Seyyid el-Hâc Mustafa Ağa b. Hüseyin, Na‘lıncı Mehmed Necib Ağa b. Mehmed, Na‘lıncı Ahmed Ağa b. Ahmed, Odacı Hüseyin Çelebi b. Yusuf.