İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 131 Hüküm no: 96 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun ile kızı Fatma’nın uhdelerindeki gedik hisselerini Ali Efendi’ye sattıkları Çorapçı mübâya‘ası Mahmiye-i İstanbul’da Azebler kurbünde Elvanzâde mahallesinde sâkineler kendi nefsinden asıl ve sadriye kebîre kızı zâtı mu‘arrefe Şerife Fâtıma Hatun bt. el-müteveffâ İbrahim İbiş tarafından husûs-ı âti’l-beyânda vekîl-i müseccel-i şer‘îsi kezâlik zâtı mu‘arrefe Şerife Âişe Hatun bt. Ahmed meclis-i şer‘-i münîrde zeytinci esnâfından işbu bâ‘isü’l-vesîka es-Seyyid Ali Efendi b. es-Seyyid ( ) mahzarında bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Ayazma Kapısı hâricinde eskici dükkânı ve bekçi odası beynlerinde kâin bir bâb çorapçı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin benimle kızım ve müvekkilem mezbûrenin yedimizde zevcim ve babası müteveffâ-yı mezbûr İbrahim İbiş’den mevrûs mülkümüz olmağla ber-minvâl-i muharrer mâlikeler olduğumuz gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid Ali Efendi’ye beş yüz guruşa bi’l-asâle ve bi’l-vekâle bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr beş yüz guruşu bana tamâmen def‘ ü teslîm ve ben dahi yedinden bi’l-asâle ve bi’l-vekâle tamâmen ahz u kabz etmemle mebî‘-i mezkûrun tağrîr ve gabnine [müte‘allika] âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm gedik-i mezkûrda benim ve kızım ve müvekkilem mezbûrenin aslâ ve kat‘â alâka ve medhalimiz kalmayıp müşteri-i merkūm es-Seyyid Ali Efendi’nin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 6 Za sene 1246 Şuhûdü’l-hâl: Sarıdemir mahallesi Muhtar-ı evveli Hüseyin Ağa b. Hasan, Muhtar-ı sânî Mehmed Ağa b. Hüseyin, Odacı Hüseyin Çelebi, Muhzır Mahmud Çelebi, Hafız İbrahim Edhem Efendi.