İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 132 Hüküm no: 97 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Zoviçe ve Maryora ile Yorgi’den varislerine intikal eden gedik hisselerinin satışı Bakkāl, Kumkapı’da pazarbaşısı ve terzibaşı gedikleri Medîne-i Üsküdar’a tâbi‘ Küçük Bakkāl karyesinde mütemekkine iken bundan akdem hâlike olan Zoviçe bt. Nikola v. Franko Nasrâniyenin verâseti sulbî kebîr oğulları Yorgi ve Todori zimmîler ve sadriye kebîre kızları Maryora ve Mağdani Nasrâniyelere münhasıra ba‘dehâ mersûm Yorgi zimmî dahi kezâlik hâlik olup verâseti zevce-i metrûkesi Kalice bt. Yorgi Nasrâniyeler ile sulbiye-i kebîre kızı Katrine Nasrâniye ve sulbî sagīr oğulları Tanaş ve Kostandi’ye münhasıra ba‘dehu mersûme Maryora Nasrâniye dahi hâlike olup verâseti zevc-i metrûku diğer Yorgi v. Kostandi zimmî ile sadriye sagīre kızları Eleniko ve Kadinko ve li-ebeveyn er ve kız karındaşları mersûmân Todori zimmî ve Mağdani Nasrâniyeye münhasıra ve mesele-i mîrâsları bi-tarîkı’l-münâhasahati’ş-şer‘iye bin seksen sehmden olup sihâm-ı mezbûreden üç yüz yetmiş sehmi mersûm Todori zimmîye ve yüz seksen beş sehmi mersûme Mağdani Nasrâniyeye ve kırk beş sehmi zevce-i mersûme Kaliçe Nasrâniyeye ve altmış üç sehmi mesfûre Katrine Nasrâniyeye ve yüz yirmi altışar sehmden iki yüz elli iki sehmi sagīrân-ı mesfûrân Tanaş ve Kostandi’ye ve kırk beş sehmi zevc-i mersûm Yorgi zimmîye ve altmışar sehmden yüz yirmi sehmi sagīretân-ı mersûmetân Eleniko ve Kadinko’ya isâbeti tahakkukundan sonra verese-i mersûmûndan mersûm Todori zimmî ile sagīretân-ı mersûmetân Eleniko ve Kadinko’nun babaları ve velîleri mersûm Yorgi zimmî ve sagīrân-ı mersûmân Tanaş ve Kostandi’nin anaları ve tesviye-i emrlerine vasiyy-i mansûbeleri zevce-i mersûme Kaliçe Nasrâniye ile mesfûretân Katrine ve Mağdani Nasrâniyeler taraflarından husûs-ı âtîde vekîlleri olduğu eşhâs-ı mersûmâtı bilir Ustabaşı Yani v. Kostandi ve Ustabaşı Nikola v. Yani nâm zimmîler şehâdetleriyle ber-nehc-i şer‘î sâbit olan Ustabaşı Ananosti v. Hıristo nâm zimmî meclis-i şer‘-i hatîrde bakkāl tâifesinden işbu bâ‘isü’s-sifr Yani zimmî ile kendiden asıl ve li-ebeveyn er karındaşı Kosti zimmî tarafından ber-vech-i âtî husûsda tasdîka vekîli Yorgi evlâd-ı Dimitri nâm zimmî muvâcehelerinde bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Kumkapı hâricinde kömürcüler içinde vâki‘ Pazarbaşı dükkânı denmekle arîf bir bâb ve civârında kâin Terzibaşı dükkânı denmekle meşhûr bir bâb ki cem‘an iki bâb bakkāl dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmişer sehmden iki yüz kırk sehm i‘tibârıyla iki yüz on bir sehmi asîlân ve müvekkil-i mersûmûnun ale’l-iştirâk ve on altı sehmi Bakkāl Kostandi zimmînin ve mâ‘adâ on üç sehmi hâlike-i ûlâ-yı mersûme Zoviçe Nasrâniyenin ile’l-helâk yedlerinde mülkleri [19a] olup ba‘de helâkihâ vereseleri verese-i mersûmûna ber-tashîh-i mezkûr mevrûs olmağla gedik-i mezkûrlardan sıgār-ı mersûmûn ile müvekkillerim mersûmûnun ber-minvâl-i muharrer ırsen mâlikler oldukları on üç sehm hisselerini lede’l-müzâyede üç yüz elli guruşda müşterekleri asîlân ve müvekkil-i mersûmûn üzerlerinde karar edip ziyâde ile tâlib-i âharları zuhûr etmeyip ve meblağ-ı mezkûr üç yüz elli guruş hisse-i mezkûrelerin semen-i misli idiği ihbâr olunmağla ben hisse-i mezkûreleri tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile asîlân ve müvekkil-i mersûmûna ale’l-iştirâki’s-seviyy üç yüz elli guruşa bi’l-vekâle bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr üç yüz elli guruşu bana tamâmen def‘ ü teslîm ve ben dahi yedlerinden vekâleten bi’t-tamâm ve’l-kemâl ahz u kabz ve hâlike-i ûlâ-yı mersûmenin defter-i kassâmına idhâl etmemle fî-mâ ba‘d gedik-i mezkûrların hisse-i şâyi‘alarında sıgār ve müvekkillerim kibâr-ı mersûmûnun aslâ ve kat‘â alâka ve medhalleri kalmayıp müşteriyyûn-ı asîlân ve vekîl-i mersûmûn Yani ve Kosti ve Yorgi zimmîlerin mülk-i müşterâları ve hakk-ı sırfları olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 5 Za sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako, Ustabaşı İsak, Yazıcı Filibos, Kabzımâl Dimitri.