İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 133 Hüküm no: 98 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kavaf esnafının başkethüdalığına Büyükarastalı Mehmed Esad Ağa’nın tayin edildiği Kethüdâ nasbı Âsitâne-i seniyye’de vâki‘ haffâfân esnâfının başkethüdâları olan el-Hâc Mehmed Ağa kethüdâlık-ı mezkûreden bu def‘a azlolunduğuna binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî Müslimînin ihbâr ve iltimâsları ve hâlâ Muhtesib-i İstanbul hâcegân-ı Dîvân-ı hümâyûn’dan Mehmed Emin Faik Efendi’nin re’yi munzam idiği tarafından mürsel Çukadâr İbrahim Ağa’nın inhâsıyla zâhir olan esnâf-ı merkūmeden işbu bâ‘isü’l-kitâb Büyükarastalı Mehmed Esad Ağa b. el-Hâc Mustafa nâm kimesneyi hâkim-i muvakki‘-i sadr-ı kitâb tûbâ-lehû ve hüsnü-meâb efendi hazretleri esnâf-ı merkūme üzerine Başkethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harakete ta‘ahhüd etmeğin mâ-hüve’l-vâki’ bi’l-ibtigā sebt ü imlâ olundu. Fî 7 Zilhicce sene 1246 Şuhûdü’l-hâl: el-Hâc Mustafa Ağa b. Ali, Yusuf Efendi b. Mehmed, el-Hâc Hasan Efendi b. el-Hâc Mehmed, es-Seyyid Davud Efendi b. İsmail, el-Hâc Mehmed Sadık Ağa b. İbrahim, es-Seyyid Mustafa Ağa b. es-Seyyid Mehmed, Molla Mustafa b. Mehmed, es-Seyyid Süleyman Efendi b. es-Seyyid Abdurrahman.