İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 134 Hüküm no: 99 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi v. Mise’nin gediğini rehin bırakarak aldığı borçlarını ödemesi konusunda kefîl gösterdiği Rehn-i aşçı Âsitâne-i aliyye’de vâki‘ aşçı ve hoşâbçı ve kebabcı ve çörenci tâifesinden Kostandi v. Mise nâm zimmî meclis-i şer‘-i münîrde hâlâ Tersâne-i âmire emîni etbâ‘ından işbu bâ‘isü’l-vesîka Küçük Ahmed Ağa’nın babası ve tarafından husûs-ı âti’l-beyânda vekîl-i sâbitü’l-vekâlesi Mehmed Efendi b. Mustafa mahzarında ikrâr-ı tâm ve takrîr-i kelâm edip müvekkil-i merkūm Ahmed Ağa’nın mâlından istidâne edeceğim bin beş yüz guruş mukābelesinde mahmiye-i mezbûre hısnı ebvâbından Langa Yenikapısı dâhilinde tütüncü [dükkânları] beynlerinde kâin bir bâb aşçı ve hoşâbçı ve kebabcı ve çörenci dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla bâ-hüccet-i şer‘iye mâlik olduğum kırk yedi buçuk sehm hissemi rehin vaz‘ ve vekîl-i merkūm yedine teslîm eylediğimde ol dahi ber-minvâl-i muharrer bi’l-vekâle irtihân ve tesellüm ve kabûl eylediğinden sonra hisse-i mezkûreyi vekîl-i merkūm Mehmed Efendi li-ecli’l-isti‘mâl bana i‘âre ve teslîm ve ben dahi isti‘âre ve kabûl eylediğimden sonra vekîl-i merkūm Mehmed Efendi oğlu ve müvekkil-i merkūm Ahmed Ağa’nın mâlından olmak üzere bin beş yüz guruş bana ikrâz ve teslîm ben dahi iktirâz ve kabz ve umûruma sarfla istihlâk etmemle mebî‘-i mezkûr ile semeni işbu târîh-i kitâbdan bir sene tamâmına değin müeccel-i mev‘ûd yine müvekkil-i merkūm Ahmed Ağa’nın mâlından olarak vekîl-i merkūm yedinden müşterâ ve makbûz bir aded hilâlî sâ‘at semeninden dahi iki yüz yirmi beş guruş ki cem‘an bin yedi yüz yetmiş beş guruş müvekkil-i merkūma zimmetimde sahîhan edâsı vâcib deynimdir dedikde gıbbe’t-tasdîki’ş-şer‘î mukırr-ı mersûmun şerîki Asodko? v. Tanaş ve Yiğitbaşı Kula v. Kostandi ve İlya v. Angeli ve Kosta v. Hıristo nâm zimmîler meclis-i şer‘-i hatîrde vekîl-i merkūm Mehmed Efendi mahzarında her biri ikrâr-ı tâm ve takrîr-i kelâm edip mukırr-ı mersûm Kostandi zimmînin müvekkil-i merkūm Ahmed Ağa’ya zimmetinde deyni olan meblağ-ı mecmû‘-ı mezkûr bin yedi yüz yirmi beş guruşa biz tarafeynden bi’l-emr ve’l-kabûl kefâlet-i mutlaka-i sahîha-i şer‘iye ile müte‘âkiben kefîl ve dâminleriz dediklerinde gıbbe’t-tasâduk[i’ş-şer‘î mâ vaka‘a bi’t-taleb ketb olundu] Fî 28 Zilka‘de sene 1246 Şuhûdü’l-hâl: Kethüdâ es-Seyyid Ali Ağa b. Hüseyin, Mütevellî Mehmed Emin Ağa b. Ahmed, Yiğitbaşı es-Seyyid Mehmed Ağa b. Ahmed.