İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 135 Hüküm no: 100 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuhanan ile oğlu Mordehay ve diğer Mordehay’ın uhdelerindeki gedik hisselerini Avram v. İsrail’e sattıkları Balıkpazarı’nda aşçı ve balık tâbeci Mahmiye-i İstanbul hısnı ebvâbından Balatkapısı hâricinde Karabaş mahallesinde mütemekkinler Yuhanan v. Mayer ve sulbî kebîr oğlu Mordehay nâm Yahûdiler meclis-i şer‘-i hatîrde işbu bâ‘isü’s-sifr diğer Mordehay v. Salamon nâm Yahûdi ile kendi nefsinden asıl ve Baban v. David ve Nesim v. İsak ve Baruh v. Yako ve Mosi v. Şimo nâm Yahûdiler taraflarından husûs-ı âtîde tasdîka vekîlleri olan Avram v. İsrail nâm Yahûdi muvâcehelerinde her biri ikrâr-ı tâm ve takrîr-i kelâm edip mahmiye-i mezbûre hısnı ebvâbından Balıkpazarı kapısı hâricinde Yahûdiler sokağında kâin bir tarafdan Avram Halile Yahûdi şerbethânesi ve bir tarafdan işkenbeci dükkânı ile mahdûd mâhiye on beşer guruş kirâ-i kadîmeli üç kepenk bir kıt‘a aşçı ve balık tâbeci dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin ale’l-iştirâk yedimizde mülkümüz olan âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh ve safka-i vâhide ile asîlân ve müvekkilûn-ı mersûmûna dört bin guruşa bey‘ ü temlîk ve teslîm eylediğimizde onlar dahi ber-minvâl-i muharrer bi’l-asâle ve bi’l-vekâle iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr dört bin guruşu bize tamâmen def‘ ü teslîm ve biz dahi yedlerinden ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini bi’l-asâle ve bi’l-vekâle ibrâ-i âmm-ı <> ile kabûlü hâvî ibrâ ve iskāt eyledik fî-mâ ba‘d gedik-i mezkûrda bizim aslâ ve kat‘â alâka ve medhalimiz kalmayıp asîlân ve müvekkilûn-ı mersûmûnun mülk-i müşterâları ve hakk-ı sırfları olmuşdur dediklerinde gıbbe’t-tasâduki’ş-şer‘î mâ vaka‘a [bi’t-taleb ketb olundu] Fî 4 Zilhicceti’ş-şerîfe sene 1246 Şuhûdü’l-hâl: Mütevellî Mehmed Emin Ağa, Hafız İsmail Ağa, Molla Hüseyin b. Yusuf, Molla Halil b. Süleyman, Molla Emin el-Muhzır. Tuzcu Hayim, Kaplanoğlu Sabatay, Kaplanoğlu İsak.