İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 136 Hüküm no: 101 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım’ın uhdesindeki bakkal gediği hisselerini Ahmed Mümtaz Efendi’ye sattığı Muhterik bakkāl gediği ihrâc-şüd Fî 13 S sene 1252 Medîne-i Üsküdar’a muzâfe Yoros nâhiyesine tâbi‘ Kanlıcak karyesinde sâkine Fâtıma Hanım bt. el-Hâc Mehmed b. Himmet tarafından husûs-ı âti’l-beyânda ikrâr ve takrîre ve i‘tâ-i hüccete vekîl olduğu zâtını ârifân Abdi Çelebi b. Mehmed Nazif ve Halil b. Süleyman şehâdetleriyle sâbit olan Pazarbaşı Süleyman Ağa b. Ömer meclis-i şer‘-i şerîf-i enverde müvekkile-i merkūmenin er karındaşı oğlu işbu bâ‘isü’l-kitâb Ahmed Mümtaz Efendi b. Hafız İbrahim mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre mahmiye-i İstanbul’da Tavukpazarı’nda Sofcular Han’ı karşısında kâin el-Hâc Mehmed dükkânı denmekle meşhûr bir bâb muhterik bakkāl dükkânından müstahlas beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla seksen sehmi merkūm Ahmed Mümtaz Efendi’nin babası Hafız İbrahim’in ve mâ‘adâ kırk sehmi dahi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olmağla gedik-i mezkûrdan ben ber-minvâl-i muharrer mâlike olduğum kırk sehm hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve babası müşterekim merkūmun izniyle merkūm Ahmed Mümtaz Efendi’ye bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm hisse-i mezkûrede benim aslâ ve kat‘â alâka ve medhalim kalmayıp müşteri-i merkūm Ahmed Mümtaz Efendi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 4 Zilhicceti’ş-şerîfe sene 1246 Şuhûdü’l-hâl: Kethüdâ-i muhzırân Hafız İsmail Ağa, Odacı Hüseyin Çelebi, Çukadâr Ali Ağa.