İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 136 Hüküm no: 102 Orijinal metin no: [19b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Arpacı İbrahim Ağa’dan varislerine intikal eden gedik hisselerinin satışı Aksaray’da bakkāl ve tütüncü Mahmiye-i İstanbul’da Aksaray kurbünde Muradpaşa mahallesinde sâkin iken bundan akdem vefât eden Arpacı İbrahim Ağa b. Salih’in sulbiye sagīre kızları Fâtıma ve Hadice ve sulbî sagīr oğlu Salih’in li-ebeveyn ammeteleri ve bâ-hüccet-i şer‘iye vasiyy-i mansûbeleri olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Âişe Hatun meclis-i şer‘-i münîrde es-Seyyid Ahmed Ağa b. Mustafa mahzarında bi’l-vesâye ikrâr-ı tâm ve takrîr-i kelâm edip mahmiye-i mezbûrede Aksaray sebîli karşısında vâki‘ Yusuf Paşa dükkânı denmekle ma‘rûf bir bâb bakkāl dükkânı ile dükkân-ı mezkûra dâhil Ma‘den Kalemi’nde mukayyed bir bâb tütüncü dükkânı derûnlarında mevcûde ve esnâfları beynlerinde gedik ta‘bîr olunur âlât-ı lâzıme-i ma‘lûmelerin yüz yirmişer sehm i‘tibârıyla seksener sehmden yüz altmış sehmi âharın ve kırkar sehmden seksen sehmi müteveffâ-yı mezbûrun hayatında ile’l-vefât yedinde mülkü ve <> ba‘de vefâtihi sıgār-ı merkūmûn Fâtıma ve Hadice ve Salih’e mevrûs oldukdan sonra hisse-i mezkûreler hâssa münâdîlerinden Mustafa Halîfe yediyle beyne’t-tâlibîn lede’l-müzâyede ve gıbbe inkıtâ‘i’r-rağbe iki bin guruşda merkūm es-Seyyid Ahmed Ağa üzerinde karâr edip ve ziyâde ile tâlib-i âharı zuhûr etmeyip ve meblağ-ı mezkûr hisse-i mezkûrelerin el-yevm semen-i misli idiği bî-garaz ehl-i vukūf haberleriyle zâhir ve mütehakkık olmağla ben hisse-i mezkûreleri tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide <> ile merkūm es-Seyyid Ahmed Ağa’ya iki bin guruşa bâ-izn-i şürekâ bi’l-vesâye bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semen-i mezkûr iki bin guruşu müşteri-i merkūmun mâlından ve yedinden tamâmen ve kâmilen bi’l-vesâye ahz u kabz ve sıgār-ı mezbûrûnun defter-i kassâmlarına idhâl etmemle fî-mâ ba‘d gedik-i mezkûrların hisse-i merkūmelerinde sıgār-ı mezbûrûnun aslâ ve kat‘â alâka ve medhalleri kalmayıp müşteri-i merkūm es-Seyyid Ahmed Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîk merkūm es-Seyyid Ahmed Ağa meclis-i şer‘-i enverde merkūme Âişe Hatun mahzarında ikrâr-ı tâm ve takrîr-i kelâm edip ânifen mâlik olduğum hisse-i mezkûrları tarafeynden bi’l-îcâb ve’l-kabûl bâtten ve sahîhan merkūme Âişe Hatun’a iki bin guruş semen-i medfû‘ ve makbûza bey‘ ü temlîk ve lâyıkı üzere teslîm eylediğimde ol dahi ber-minvâl-i muharrer ba‘de’l-iştirâ ve’t-temellük ve’t-tesellüm ve’l-kabz ve’l-kabûl akd-i mezkûrda tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt etmemizle hisse-i gedik-i mezkûrlarda benim aslâ ve kat‘â alâka ve medhalim kalmayıp müşteriye-i mezbûre Âişe Hatun’un mülk-i müşterâsı ve hakk-ı sırfı olmuşdur ke-emsâlihâ mâlike ve mutasarrıfe olsun dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 4 Zilhicce sene 1246 Şuhûdü’l-hâl: Pazarbaşı Süleyman Ağa, Bölükbaşı Molla Abdi, Molla Hüseyin b. Yusuf, Molla Halil b. Süleyman, Molla Emin el-Muhzır.