Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 413 Hüküm no: 484 Orijinal metin no: [78(2)a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dülger Mihal v. Moyser’in çalışmasına karşılık alacağı ücreti konusunda Feyzullah Efendi ile sulh olduğu Dülger tâifesinden olup mahmiye-i İstanbul’da Parmakkapı kurbunda sâkin Mihal v. Moyser nâm zimmî meclis-i şer‘-i şerîf-i enverde mahmiye-i mezbûrede Mustafa Bey mahallesinde sâkin a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în sa‘âdetlü Feyzullah Efendi b. Mehmed Efendi b. Mehmed Efendi tarafından husûs-ı âti’l-beyâna vekîl-i müsecceli olan müvekkil-i mûmâ-ileyh Feyzullah Efendi’nin Anadolu Hisarı’nda vâki‘ yalı ta‘bîr olunun menziline beher yevm kırkar akçe ücretle yüz on yedi gün tamâmına değin vekîl-i mezbûra nefsimi îcâr ol dahi istîcâr ve kabûl ettiğinden sonra ben eyyâm-ı mezkûrede edâ-i hizmet edip lâkin ücret-i mezkûreden eyyâm-ı mezkûrede müctemi‘ olan dört bin altı yüz seksen akçe hakkımın iki bin yüz altmış akçesini vekîl-i mezbûr yedinden ahz u kabz edip bâkī iki bin beş yüz yirmi akçe hakkım kalmağın bundan akdem meblağ-ı bâkī-i mezbûru vekîl-i mezbûrdan taleb ve da‘vâ eylediğimde ol dahi inkâr etmekle beynimizde münâza‘ât-ı kesîre vukū‘undan sonra muslihûn tavassutuyla da‘vâ-yı mezkûremden beni vekîl-i mezbûr ile yedi yüz akçe üzerine sulh eylediklerinde ben dahi sulh-i mezkûru kabûl ve bedel-i sulh olan meblağ-ı mezbûr yedi yüz akçeyi vekîl-i mezbûr yedinden ahz u kabz ettiğimden sonra husûs-ı mezkûra müte‘allika âmme-i da‘vâdan müvekkil-i mûmâ-ileyh Efendi vekîl-i mezkûrûn zimmetlerini ibrâ-i âmla ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, İbrahim Çelebi b. Mehmed, Ali b. Bâli, Mehmed b. İdris ve gayruhüm.