İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 138 Hüküm no: 103 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kumkapıdaki bakkal dükkânı gedik hisselerinin satışı Bakkāl Âsitâne-i aliyye’de vâki‘ bakkāl tâifesinden kendi nefsinden asıl ve li-ebeveyn er karındaşı Nikola v [.] Polizo v. Nikola zimmî tarafından husûs-ı âti’l-beyânda vekîl olduğu Bakkāl Dimo v. Yorgi ve Ananosti v. Hıristo nâm zimmîler şehâdetleriyle sâbit olan Yorgi nâm zimmî meclis-i şer‘-i hatîrde yine tâife-i mersûmeden işbu hâmilü’r-rakīm Kostandi v. Dimo nâm zimmî muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûrede Kumkapı kurbünde Nişancı Mehmed Paşa-yı atîk Hamamı külhanı karşısında Ermeni Kilisesi köşesinde kâin kuyubaşı dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla beş buçuk sehmi Dimo zimmînin ve elli üç buçuk sehmi Bakkāl Kostandi v. Ligori zimmînin ve mâ‘adâ altmış bir sehmi dahi akd-i âti’z-zikrin sudûruna değin benim ve karındaşım müvekkilim mersûmun ale’l-iştirâk yedimizde bâ-hüccet-i şer‘iye mülkümüz olmağla gedik-i mezkûrdan ben ve karındaşım müvekkilim mersûmun ber-minvâl-i muharrer mâlikler olduğumuz hisse-i mezkûreyi tarafeynden îcâb ve kabûlü hâvî şurût-ı müfside ve uhûd-ı mubtıladan ve muvâza‘adan ârî bey‘-i bâtt-ı sahîh-i şer‘î ve safka-i vâhide ve bâ-izn-i şürekâ mersûm Kostandi zimmîye yedi bin beş yüz guruşa bi’l-asâle ve bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr yedi bin beş yüz guruşu bana tamâmen def‘ ü teslîm ve ben dahi yedinden bi’l-asâle ve bi’l-vekâle tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fî-mâ ba‘d hisse-i mezkûrda benim ve karındaşım müvekkilim mersûmun aslâ ve kat‘â alâka ve medhalimiz kalmayıp müşteri-i mersûm Kostandi zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 14 Z sene [1]246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı İsak, Kabzımâl Sava, Yazıcı Yani, Ustabaşı Kiryako.