İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 138 Hüküm no: 104 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirkapı’daki bakkal gediği hisselerinin satışı Demirkapı’da bakkāl gediği 2 aded Vilâyet-i Rumeli’de Tekfurdağı kazâsı kurâlarından Yeniköy ahâlîsinden olup mahmiye-i İstanbul’da Bahçekapısı hâricinde bakkāl dükkânında mütemekkin Yorgaki v. Dimitri zimmî meclis-i şer‘-i hatîrde Bakkāl İstirati v. Yorgaki zimmî ile mersûm İstirati zimmînin min-kıbeli’l-eb ceddesi olup karye-i mezbûre ahâlîsinden mu‘arrefetü’ş-şahs Ağura bt. Nikola Nasrâniye hâzır oldukları hâlde işbu hâmilü’r-rakīm Foti v. Ananya zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Demirkapı kurbünde vâki‘ Ahmed Ağa [dükkânı] denmekle meşhûr bir bâb ve yine bâb-ı merkūm kurbünde Elvan Câmi‘-i şerîfi civârında kâin Hanım dükkânı denmekle arîf bir bâb ki cem‘an iki bâb bakkāl dükkânları derûnlarında mevcûde beyne’l-esnâf gedik ta‘bîr olunur birer kantar ve birer terâzî ma‘a derâhim ve birer akçe tahtası ve sâir âlât-ı lâzıme-i ma‘lûmelerin her biri yüz yirmişer sehm i‘tibârıyla cem‘an iki yüz kırk sehmin on beşer sehmden cem‘an otuz sehmi benim ve on ikişer buçuk sehmden cem‘an yirmi beş sehmi hâzırân-ı mersûmândan mesfûr İstirati zimmînin ve beşer sehmden cem‘an on sehmi mersûme Ağura Nasrâniyenin akd-i âti’z-zikrin sudûruna değin iştirâken ve şâyi‘an yedimizde emvâlimiz olmağla benimle hâzırân-ı mersûmândan her birimiz âlât-ı lâzıme-i mezkûrelerde ber-i‘tibâr-ı merkūm mâlikler olduğumuz cem‘an altmış beş sehm hisse-i şâyi‘alarımızı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Foti zimmîye iki bin yedi yüz guruşa bey‘ ü temlîk ve vech-i lâyıkı üzere her birimiz teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr iki bin yedi yüz guruşu benimle hâzırân-ı mersûmâna def‘ ü teslîm eylediğinde biz dahi yedinden tamâmen ve kâmilen ahz u kabz ve bi-kadri’l-hısas beynimizde iktisâm etmemizle mebî‘-i mezkûrun tağrîr ve gabnine müte‘allika âmme-i da‘vâdan ben ve hâzırân-ı mersûmân İstirati zimmî ve Ağura Nasrâniyeden her birimiz mersûm Foti zimmînin zimmetlerini ol dahi kezâlik mebî‘-i mezkûrun tağrîr ve gabnine müte‘allika âmme-i da‘vâdan benimle hâzırân-ı mesfûrânın zimmetlerini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik ba‘de’l-yevm mârru’z-zikr iki bâb dükkân derûnlarında mevcûde gedik ta‘bîr olunan âlât-ı lâzıme-i mezkûrelerde ber-i‘tibâr-ı merkūm cem‘an iki yüz kırk sehmin altmış beş sehmi mesfûr Foti zimmînin emvâl-i müşterâtı ve hakk-ı sırfı olup benimle hâzırân-ı mersûmân İstirati zimmî ve Ağura Nasrâniyenin kat‘â alâka ve medhalimiz kalmamışdır dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 7 Z sene 1246 Şuhûdü’l-hâl: Pazarbaşı Süleyman Ağa, Yiğitbaşı Abdi Çelebi. Kabzımâl Sava, Yazıcı Usta Yani, Ananosti v. Hıristo, Dimitri v. Yani, Yani v. Kosta, Kiryako v. Vasil.