İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 140 Hüküm no: 105 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkçılar sukunda bulunan şiruganhane gediği hisselerinin satışı Şîrugancı Âsitâne-i aliyye’de vâki‘ şîrugancı esnâfından Bratamos v. Pavli nâm zimmî meclis-i şer‘-i hatîr-i lâzımü’t-tevkīrde esnâf-ı merkūmeden Vasil v. Anaştaş nâm zimmî asâleten ve mersûm Vasil zimmînin li-ebeveyn er karındaşı olup kendi nefsinden asıl ve vilâyet-i Anadolu’da Nevşehir kazâsına tâbi‘ Zelil? [Zile] karyesi re‘âyâsından olup el-yevm karye-i mezbûrede mütemekkin Bratamos v. Eftim v. Kalender nâm zimmî tarafından husûs-ı âti’l-beyânda vekîl olduğu karye-i mezbûre ahâlîsinden olup bu esnâda Âsitâne-i aliyye’ye gelen Pavli v. Samuyel ve İstefan v. Yorgi zimmîler şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm-i şer‘î lâhık olan Luka veledi’l-mersûm Anaştaş nâm zimmî vekâleten hâzır oldukları hâlde esnâf-ı merkūmeden işbu hâmilü’r-rakīm Yuvan v. Pavli ve Sofron v. Ligori nâm zimmîler [20b] muvâcehelerinde ikrâr-ı tâm ve takrîr-i kelâm edip mahmiye-i İstanbul’da Kumkapı dâhilinde Balıkçılar sûkunda tütüncü dükkânıyla menzil beynlerinde kâin muhterik bir bâb şîruganhâne derûnundan müstahlas beyne’l-esnâf gedik ta‘bîr olunur bir çift taş ve iki kantar ve iki terâzî ma‘a derâhim ve dört küp ve bir çift kazgan ve sâir âlât-ı lâzıme-i ma‘lûmenin yüz yirmi sehm i‘tibârıyla altmış sehmi benim ve yirmişer sehmden cem‘an kırk sehmi asîlân-ı mersūmân Vasil ve Luka zimmîlerin ve yirmi sehmi dahi müvekkil-i mersûm Bratamos zimmînin akd-i âti’z-zikrin sudûruna değin iştirâken ve şâyi‘an yedimizde emvâlimiz olmağla ben ber-vech-i muharrer mâlik olduğum altmış sehm hisse-i şâyi‘am ile hâzırân-ı mersûmândan asıl-ı mersûm Vasil zimmî mâlik olduğu yirmi sehm hisse-i şâyi‘asını bi’l-asâle ve mesfûr Luka zimmî mâlik olduğu yirmi sehm hisse-i şâyi‘asını kezâlik bi’l-asâle ve müvekkil-i mersûm Bratamos zimmînin mâlik olduğu yirmi sehm hisse-i şâyi‘asını bi’l-vekâle her birimiz tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûmân Yuvan ve Sofron zimmîlere bin beş yüz guruşa ale’l-iştirâki’s-seviyy bey‘ ü temlîk ve teslîm eylediğimizde onlar dahi ber-vech-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr bin beş yüz guruşu benimle asıl ve vekîl hâzırân-ı mesfûrân Vasil ve Luka zimmîlere def‘ ü teslîm eylediklerinde biz dahi yedlerinden bi’l-asâle ve bi’l-vekâle tamâmen ve kâmilen ahz u kabz ve bi-kadri’l-hısas iktisâm etmemizle mebî‘-i mezkûrun tağrîr ve gabnine müte‘allika âmme-i da‘vâdan ben ve hâzırân-ı asıl ve vekîl-i mersûmândan her birimiz mesfûrân Yuvan ve Sofron zimmîlerin zimmetlerini onlar dahi kezâlik mebî‘-i mezkûrun tağrîr ve gabnine müte‘allika âmme-i da‘vâdan benimle asıl ve müvekkil-i mersûmûnun zimmetlerini her birimiz ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın asâleten ve vekâleten ibrâsını kabûl etmemizle ol vechile âlât-ı <> lâzıme-i müstahlasa-i mezkûre mersûmân Yuvan ve Sofron zimmîlerin ale’l-iştirâki’s-seviyy emvâl-i müşterâları ve hakk-ı sırfları olup benimle asıl ve müvekkil-i mersûmûn Vasil ve Luka ve Bratamos zimmîlerin kat‘â alâka ve medhalimiz kalmamışdır dedikde gıbbe’t-tasâduki’ş-şer‘î mâ vaka‘a bi’t-taleb ketb olundu. Fî 7 Z sene 1246 Şuhûdü’l-hâl: Kethüdâ Hüseyin Ağa b. Ali, Yiğitbaşı Eğrikapılı Osman Ağa ve gayruhum. Beyoğlunda Endib, Alacahamam’da Todori, Tophânede Aci İlya v. Yuvakim.