İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 141 Hüküm no: 106 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapan-ı dakik ve Cibâli’de bulunan varilci gediği hisselerinin satışı Varilci Âsitâne-i aliyye’de vâki‘ varilci tâifesinden İstemat v. Lefter nâm zimmî meclis-i şer‘-i hatîrde tâife-i mersûmeden işbu hâmileyü’r-rakīm Marko v. Yani ve Kosti v. Yanaki nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Kapan-ı dakīk kapısı hâricinde Havyarcı Aci Kostandi zimmî dükkânı ve Yakof Yahûdi menzili beynlerinde kâin şehriye yirmi beş guruş kirâ-i kadîmeli bir bâb varilci dükkânı ve dükkân-ı mezkûra merbût Cibâli kapısı hâricinde Paralimon dükkânı ve Hayim Yahûdi menzili beyninde kâin beher mâh yirmi beş guruş kirâ-i kadîmeli bir bâb varilci mağazası derûnlarında mevcûde Başmuhâsebe Kalemi’nde mukayyed ve mu‘teber beyne’l-esnâf gedik ta‘bîr olunur dört keser ve iki küştere ve iki destere ve bir satır ve iki tokmak ve iki bıçkı ve sâir âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye yedimde müstakıllen mâlım ve mülküm olmağla ben ber-minvâl-i muharrer mâlik olduğum âlât-ı muharrere-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûmân Marko ve Kosti zimmîlere ale’l-iştirâki’s-seviyy on bin guruşa bey‘ ü temlîk ve teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr on bin guruşu mersûmân bana tamâmen def‘ ü teslîm ve ben dahi yedlerinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm âlât-ı gedik-i muharrere-i mezkûrede benim aslâ ve kat‘â alâka ve medhalim kalmayıp müşteriyân-ı mersûmân Marko ve Kosti zimmîlerin iştirâken mülk-i müşterâları ve hakk-ı sırfları olmuşdur dedikde gıbbe’t-tasâduki’ş-şer‘î mâ vaka‘a [bi’t-taleb ketb olundu] Fî 5 Zilhicce sene 1246 Şuhûdü’l-hâl: Kethüdâ-i muhzırân İsmail Ağa, Odacı Hüseyin Çelebi. Kâhya Mihal v. Yorgi, Yiğitbaşı Todori v. Foti, Ustabaşı Foti v. Yani, Yasef v. Mihal.