İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 142 Hüküm no: 107 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havyarcı Bratamos ve Yuvan’ın gedik hisselerini Kostandi’ye sattıkları Havyarcı Âsitâne-i aliyye’de vâki‘ havyarcı tâifesinden Bratamos ve Yuvan veledey Filibos nâm zimmîler meclis-i şer‘-i hatîrde li-ebeveyn er karındaşları işbu bâ‘isü’s-sifr Kostandi nâm zimmî muvâcehesinde her biri ikrâr-ı tâm ve takrîr-i kelâm edip mahmiye-i mezbûre hısnı ebvâbından Ayazma Kapısı hâricinde Zeytinciler içinde boyacı ve zeytinci dükkânları beynlerinde kâin Papasoğlu dükkânı denmekle arîf bir bâb havyarcı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yüz beş sehmi âharın ve yedi buçuk sehmi mersûm Kostandi zimmî ile diğer karındaşı Lazari zimmînin ber-vech-i iştirâk ve bâkī yedi buçuk sehmi dahi akd-i âti’z-zikrin [21a] sudûruna değin bizim bâ-hüccet-i şer‘iye yedimizde ırsen ve şirâen mülkümüz olmağla biz gedik-i mezkûrdan ber-minvâl-i muharrer mâlik olduğumuz yedi buçuk sehm hisse-i şâyi‘amızı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile karındaşımız mersûm Kostandi zimmîye iki bin iki yüz guruşa bey‘ ü temlîk ve vech-i lâyıkı üzere teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin iki yüz guruşu bize tamâmen def‘ ü teslîm ve biz dahi yedinden ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrun hisse-i şâyi‘asında bizim aslâ ve kat‘â alâka ve medhalimiz kalmayıp karındaşımız müşteri-i mersûm Kostandi zimmînin mülk-i müşterâsı ve hakk-ı sırfı olmuşdur dediklerinde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 23 Şevvâl sene 1246 Şuhûdü’l-hâl: Kethüdâ-i muhzırân İsmail Ağa, Odacı Hüseyin Çelebi. Ustabaşı Petro v. Luka, Ustabaşı Nikola v. Manol, Ustabaşı Yorgi v. Marko, İlya v. Pandeli.