İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 143 Hüküm no: 108 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın uhdesindeki gedik hisselerini Mehmed b. Ahmed’e sattığı Gözlemeci gediği Muhrec-şüd Fî 20 R sene [12]49 Mahmiye-i İstanbul’da Üskübî mahallesinde sâkin çörekçi esnâfından el-Hâc Halil Ağa b. el-Hâc Ahmed nâm kimesne meclis-i şer‘-i münîrde gözlemeci esnâfından işbu bâ‘isü’l-kitâb Mehmed b. Ahmed nâm kimesne muvâcehesinde ikrâr-ı tâm ve takrîr-i kelâm edip mahmiye-i mezbûrede Ebulfeth Sultan Mehmed Han Câmi‘-i şerîfi civârında Nişancı Mehmed Paşa Câmi‘-i şerîfi karşısında medrese kapısı ile berber dükkânı beyninde kâin bir bâb gözlemeci dükkânı derûnunda mevcûde beyne’l-esnâf gedik ta‘bîr olunur altı tebsi ve bir tâbe ve bir sac ve iki karavana ve bir tencere ve bir çekmece ve iki merdâne ve sâir âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye müstakıllen mülküm olmağla ben ber-minvâl-i muharrer mâlik <> olduğum gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mehmed’e sekiz yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr sekiz yüz guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Mehmed’in mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 17 Zilka‘de sene 1246 Şuhûdü’l-hâl: es-Seyyid el-Hâc İbrahim Usta, Mercanlı Hüseyin Usta, Mehmed Emin Usta, Yiğitbaşı Molla İsmail, Ahmed Usta.