İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 143 Hüküm no: 109 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lazari v. Takan ile Yorgi v. Harlem’in gedik hisselerini Vasil ve Lefter’e sattıkları Bakkāl Âsitâne-i seniyye’de vâki‘ bakkāl tâifesinden Lazari v. Takan ve Yo[r]gi v. Harlem nâm zimmîler meclis-i şer‘-i hatîrde yine tâife-i mersûmeden işbu hâmileyü’r-rakīm Vasil v. İspir ve Lefter v. Yani nâm zimmîler muvâcehelerinde her biri ikrâr-ı tâm ve takrîr-i kelâm edip mahmiye-i mezbûrede Kanlıfırın nezdinde kafesçi ve doğramacı dükkânları beynlerinde kâin ( ) denmekle arîf bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla kırk sehmi Yorgi zimmînin ve mâ‘adâ kırkar sehmden seksen sehmi akd-i âti’z-zikrin sudûruna değin bizim bâ-hüccet-i şer‘iye yedimizde iştirâken mülkümüz olmağla gedik-i mezkûrdan biz ber-minvâl-i muharrer mâlikler olduğumuz hisse-i mezkûremizi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekimiz mersûmun izniyle mersûmân Vasil ve Lefter zimmîlere ale’l-iştirâki’s-seviyy iki yüz elli guruşa bey‘ ü temlîk ve vech-i lâyıkı üzere teslîm eylediğimizde onlar dahi ber-minvâl-i meşrûh iştirâken iştirâ ve temellük ve tesellüm ve kabz ve kabûl edip ve semen-i mezkûr iki yüz elli guruşu bize tamâmen def‘ ü teslîm ve biz dahi yedlerinden bi’t-tamâm ve’l-kemâl ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tara <> feynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm hisse-i mezkûrede bizim aslâ ve kat‘â alâka ve medhalimiz kalmayıp müşteriyân-ı mersûmân Vasil ve Lefter zimmîlerin mülk-i müşterâları ve hakk-ı sırfları olmuşdur dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene sitte ve erba‘în ve mi’eteyn ve elf. Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Kabzımâl Sava, Yazıcı Yani, <> Ustabaşı Kiryako, Ustabaşı İstefan.