İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 148 Hüküm no: 115 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ragıb Efendi’nin eski vekilini azlederek yerine Ahmed Efendi’yi vekil tayin ettiği Şam-ı Şerîfde azl-i vekâlet Şam-ı cennet-meşâm müftîsi merhûm ve mağfûrün-leh es-Seyyid Hasan Efendi ibni’l-merhûm Takiyyüddin Efendizâde işbu râfi‘u’l-vesîka es-Seyyid Mehmed Ragıb Efendi mahmiye-i İstlâmbol’da meclis-i şer‘-i şerîf-i lâzımü’t-teşrîfde takrîr-i kelâm ve ta‘bîr ani’l-merâm edip ben bundan akdem Şam-ı Şerîf ahâlîsinden Hamzazâde es-Seyyid Nesib Efendi’yi pederim merhûm-ı mûmâ-ileyhden âid hisse-i irsiyem husûsuna ve sâire-i müte‘allika bi’l-cümle umûrumu idâre ve rü’yete tarafımdan tevkîl eder oldukda “küllemâ ahractüke fe-ente vekîlî” mazmûnu üzere vekâlet-i devriye ile kabûlünü hâvî vekîl etmişidim el-hâletü hâzihî ben vekîlim merkūmun azlini murâd etmemle ber-minvâl-i meşrûh vekâlet-i mu‘allakadan rücû‘ birle vekâlet-i müncizeden merkūm es-Seyyid Nesib Efendi’yi ihrâc eylediğimden sonra li-ebeveyn er karındaşım olup Şam-ı şerîf’de sâkin es-Seyyid Ahmed Efendi’yi tarafımdan vekâlet-i mutlaka-i sahîha-i şer‘iye ile kabûlüne mevkūfe vekîl ve nâib-i menâb nasb u ta‘yîn eyledim dedikde hıfzan li’l-makāl işbu vesîka-i enîka bi’l-ibtigā sebt ü imlâ olundu. Fî 21 Zilhicce sene 1246 Şuhûdü’l-hâl: Semyeli? Tatar Mehmed Ağa b. Mehmed, Tatar Mustafa Ağa b. diğer Mehmed, Tatar Feyzi Ağa b. âhar Ahmed.