İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 149 Hüküm no: 116 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veliyyüddin Ağa’nın uhdesindeki gedik hisselerini Mehmed ve İbrahim’e sattığı Çörekçi Odunkapısı’nda Âsitâne-i aliyye’de vâki‘ çörekçi esnâfından Veliyyüddin Ağa b. Mehmed meclis-i şer‘-i şerîf-i enverde esnâf-ı mezkûreden işbu bâ‘iseyü’l-vesîka es-Seyyid Mehmed b. Abdullah ve es-Seyyid İbrahim b. es-Seyyid Osman nâm kimesneler mahzarlarında ikrâr-ı tâm ve takrîr-i kelâm edip mahmiye-i mezbûre hısnı ebvâbından Odunkapısı ittisâlinde vâki‘ ma‘lûmü’l-hudûd bir bâb çörekçi dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla kırk sehmi Kaymakçı Ahmed Ağa’nın evlâdlarının ve yirmi sehmi Zeyneb Hatun’un ve mâ‘adâsı altmış sehmi dahi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olmağla gedik-i mezkûrdan ber-minvâl-i muharrer mâlik olduğum altmış sehm hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müştereklerim izinleriyle merkūmân es-Seyyid Mehmed ve es-Seyyid İbrahim’e ale’l-iştirâki’s-seviyy dokuz bin on guruşa bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl edip semen-i mezkûr dokuz bin on guruşu bana def‘ ü teslîm ve ben dahi yedlerinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrun hisse-i mezkûresinde benim aslâ ve kat‘â alâka ve medhalim kalmayıp müşteriyân-ı merkūmân es-Seyyid Mehmed ve es-Seyyid İbrahim’den her birinin iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 5 Z sene 1246 Şuhûdü’l-hâl: Kethüdâ Mehmed Sadık Ağa, Yiğitbaşı İsmail Ağa, el-Hâc Halil Usta, Yenihamamlı es-Seyyid Ömer Usta, Çarşambalı es-Seyyid Mehmed Usta, Bağcı Mehmed Memiş Ağa.