İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 149 Hüküm no: 117 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giridli Derviş Mustafa’nın uhdesindeki gedik hisselerinden bir kısmını Halil Ağa’ya sattığı Ayasofya’da sabuncu Âsitâne-i seniyye’de vâki‘ sabuncu esnâfından Giridî Karpuz Derviş Mustafa Ağa nâm kimesne meclis-i şer‘-i münîrde esnâf-ı mezkûreden işbu bâ‘isü’l-kitâb Giridî Halil Ağa b. Ali mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olan mahmiye-i mezbûrede Ayasofya-i kebîr Câmi‘-i şerîfi kurbünde tabla vaz‘ıyla sergi derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısfını yedimde ibkā ve nısf-ı âharını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Halil Ağa’ya bin iki yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin iki yüz guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrun nısf hissesinde benim aslâ ve kat‘â alâka ve medhalim kalmayıp müşteri-i merkūm Halil Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 14 Z sene 1246 Şuhûdü’l-hâl: Hafız İsmail Ağa b. Mustafa, Kethüdâ Mehmed Raşid Ağa b. Ahmed, es-Seyyid Ali Ağa b. Ömer, es-Seyyid Ali Ağa b. es-Seyyid Ali, el-Hâc Ahmed Ağa b. Abdullah.