İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 150 Hüküm no: 118 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Kirkor’un uhdesindeki gediğini Nişan v. Avakim’e sattığı Kuyumcu mübâya‘ası Mahmiye-i İslambol’da Samatya kurbünde Hacce Kadın mahallesinde mütemekkin Kuyumcu Kirkor v. Matos nâm zimmî meclis-i şer‘-i hatîrde işbu bâ‘isü’s-sifr Kuyumcu Nişan v. Avakim nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olup mahmiye-i mezbûrede Mercan çarşısında kâin Na‘lbur Hanı denmekle şehîr bir bâb hanın hîn-i duhûlde sol tarafda Kalıpçı Sahtel zimmî odaları beyninde vâki‘ şehriye yüz otuz para kirâlı bir bâb kuyumcu odası derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Nişan zimmîye dokuz yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr dokuz yüz guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Nişan zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 16 Zilhicce sene 1246 Şuhûdü’l-hâl: Hafız İsmail Ağa b. Mustafa, Molla Halil b. Süleyman. Çizmeci Artin v. Toros, Sahtel v. Ohan, Çizmeci Bedros, Kuyumcu Hamparsum.