İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 151 Hüküm no: 119 Orijinal metin no: [22b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Markar’ın uhdesindeki gedik hisselerinden bir kısmını Mihal v. Kiryako’ya sattığı Bakkāl, Kocamustafapaşa’da Âsitâne-i seniyye’de vâki‘ bakkāl tâifesinden Dimitri v. Marko nâm zimmî meclis-i şer‘-i hatîrde yine tâife-i mersûmeden işbu hâmilü’r-rakīm Mihal v. Kiryako nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul’da Kocamustafapaşa kurbünde vâki‘ Şeyh dükkânı denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme[nin] yüz yirmi sehm i‘tibârıyla altmış sehmi Bakkāl Apostol v. Kostandi zimmînin ve mâ‘adâ altmış sehmi dahi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum altmış sehm hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîkim mersûmun izn ü icâzetiyle mersûm Mihal zimmîye bin sekiz yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin sekiz yüz guruşu müşteri-i mersûm Mihal zimmî bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrda olan altmış sehm hissemde benim aslâ ve kat‘â alâka ve medhalim kalmayıp müşteri-i mesfûr Mihal zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 23 Zilhicce sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı İsak, Kabzımâl Sava, Yazıcı Yani.