İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 151 Hüküm no: 120 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafının işlemlerini yürütmek üzere nizam ustaları ve yönetici tayinlerinin yapıldığı Bakkālâna nizâm ustaları nasbı Âsitâne-i seniyye’de vâki‘ bi’l-cümle bakkālân esnâfının pazarbaşıları bulunan kimesne ile ale’d-devâm lonca odalarında mevcûd ve müctemi‘ olarak esnâf-ı merkūmenin vukû‘yâfiye [vukû‘-yâfte] olan her bir umûrlarını idâre ve rü’yet etmek üzere on iki nefer nizâm ustası ve bir nefer kabzımâl ve bir nefer yazıcıları olup esnâf-ı mezkûre her sene zikr olunan nizâm ustaları ve kabzımâl ve yazcılarından ba‘zılarını ibkā ve ba‘zılarının tebdîliyle yerlerine âharlarını nasb u ta‘yîn ettirmek nizâm-ı kadîmlerinden olduğuna mebnî işbu sene-i mübârekede dahi esnâf-ı merkūme ber-vech-i muharrer kabzımâl ve yazıcılarını ve ba‘zı nizâm ustalarını ihrâc ve ba‘zılarının ibkāsını istid‘â etmeleriyle esnâf-ı merkūmenin nizâm ustalığı ve kabzımâl ve yazıcılığa müte‘allik cemî‘ umûrlarını idâre ve rü’yete erbâbından ve şurût-ı nizâmlarına muttali‘înden olup beyne’l-esnâf mu‘teber oldukları Pazarbaşı Süleyman Ağa ve Bölükbaşı Molla Abdi ve sâir mazbûtü’l-esâmî tüccâr haberleriyle zâhir ve bedîdâr olan yine esnâf-ı merkūmeden işbu hâmilü’s-sifr Çarşambapazarlı İsak v. Kiryako ve Kıbleçeşmeli Kiryako v. Nikola ve İncirdibli Yani v. Kosta ve Fenerli Ananosti v. Hıristo ve Zindandelenli Kiryako v. Vasil ve yağcı bakkāllarından Balıkpazarlı Zaharya v. Yorgi zimmîleri hâkim-i muvaşşıh-ı bâlâ-yı kitâb bi-tevkī‘ihi’r-refî‘i’l-müstetâb rafa‘a kadrahû mevlâhü’l-Vehhâb efendi hazretleri hâlâ muhtesib-i İstanbul sa‘âdetlü Mehmed Emin Faik Efendi hazretlerinin re’yi munzam olduğu hâlde bi’l-iltimâs nizâm ustalığında ibkā ve takrîr ve mukaddemâ kabzımâl Mercanlı Dimitri v. Yani ve sâbıkā Yazıcı Filibos v. Nikola ve Bozdoğankemerli Yako v. Yuvan ve Şehzâdebaşılı İstefan v. Bratamos ve Hocapaşalı Yovakim v. Simyon ve yağcı bakkāllarından Canbâziye Hanı’nda Dimitri v. Panayot nâm zimmîleri nizâm ustası ve Veznecilerli Vasil v. Yani zimmîyi ilhâk ve Sarıgezli [Sarıgörezli] Sava v. Anaştaş zimmîyi kabzımâl ve Mercanlı Yani v. Dimo zimmîyi yazıcı nasb u ta‘yîn ve tüccâr emvâlinin muhâfazasına dâimâ dikkat için bi’l-cümle tüccâr taraflarından esnâf-ı merkūme üzerlerine nâzırları olan hâlâ Kapan-ı asel Nâzırı el-Hâc Feyzullah Ağa ve Galata Yağkapanı Nâzırı Süleyman Ağa’yı dahi kemâ-fi’l-evvel nezâretde ibkā buyurup her biri ale’d-devâm pazarbaşılarıyla lonca odasında mevcûd olarak bi’l-ma‘iyye umûr-ı esnâfı idâre ve rü’yet ve emvâl-i tüccârın muhâfazasına ve sa‘y <> ü dikkat edip muhâlif-i şer‘-i şerîf ve mugāyir-i rızâ-yı âlî ve nizâm-ı kadîm tüccâr ve esnâfdan kimesneye ta‘addî vü rencîde ve gadr ü remîde etmemek üzere her birine emr ü tenbîh buyurduklarında onlar dahi kabûl ve ber-mûceb-i emr ü tenbîh amel ve harakete ta‘ahhüd etmeleriyle mâ vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene sitte ve erba‘în ve mi’eteyn ve elf. Şuhûdü’l-hâl: İbrahim Ağa tâbi‘-i nâzır-ı ihtisâb, Kethüdâ-i muhzırân Hafız İsmail Ağa, Vekîlharc el-Hâc Süleyman Ağa, Odacı Hüseyin Çelebi, Muhzır Mahmud Çelebi ve gayruhum.