İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 153 Hüküm no: 121 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Apostol’un uhdesindeki gedik hisselerinden bir kısmını Ahmed b. Salih’e sattığı Bakkāl Âsitâne-i aliyye’de vâki‘ bakkāl tâifesinden Apostol v. Yani nâm zimmî meclis-i şer‘-i hatîrde işbu bâ‘isü’l-vesîka Bakkāl Ahmed b. Salih mahzarında ikrâr-ı tâm ve takrîr-i kelâm edip mahmiye-i mahkiyede Mimâr sûkunda köşede kâin Hacı Pervane dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yüz sehmi âharın ve yirmi sehmi akd-i âti’z-zikrin sudûruna değin benim yedimde mülküm olmağla ben gedik-i mezkûrdan mâlik olduğum yirmi sehm hisse-i mezkûremi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Ahmed’e yüz guruşa bâ-izn-i şürekâ bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semen-i mezkûr yüz guruşu müşteri-i merkūm yedinden tamâmen ahz u kabz etmemle fî-mâ ba‘d gedik-i mezkûrda olan hisse-i mezkûremde benim aslâ ve kat‘â alâka ve medhalim kalmayıp müşteri-i merkūm Ahmed’in mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 21 Z sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı İsak, Kabzımâl Sava, Yazıcı Yani.