İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 153 Hüküm no: 122 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yetim ve öksüz olan Esma’nın ücreti karşılığında Ali Efendi’nin hanımının hizmetine verildiği Sagīreyi îcâr-ı hâkim Fi’l-asl vilâyet-i Rumeli’de Selanik kazâsına tâbi‘ Vardarova nâhiyesi ahâlîsinden işbu hâzır bi’l-meclis Esma bt. Osman nâm sagīrenin hâkimden gayrı velîsi ve münfik-i şer‘îsi olmamağla hâkim-i muvakki‘-i sadr-ı kitâb tûbâ-lehû ve hüsnü-meâb efendi hazretleri sagīre-i mezbûre Esma’yı İstanbul’da Sultan Mehmed civârında Kumrulu Mescid denmekle arîf Mimâr Sinan-ı atîk Yusuf Ağa mahallesinde sâkine işbu bâ‘isetü’l-kitâb Nefise Hanım bt. Ahmed menzilinde hizmet etmek üzere beher mâh on ikişer guruşa merkūme Nefise Hanım’ın zevci Anadolu kuzâtı [23b] eşrâfından es-Seyyid Ali Efendi b. es-Seyyid Mustafa’ya îcâr ve teslîm ve ücret-i mezkûresi olan şehriye on ikişer guruşun dokuzar guruşunu sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve bâkī üçer guruşunu sagīre-i mezbûre için yedinde ibkāya merkūm Ali Efendi’ye bi’l-velâye emir buyurduklarında ol dahi ber-minvâl-i muharrer istîcâr ve kabûl ve ücret-i mezkûrenin dokuzar guruşunu sagīre-i mezbûrenin nafaka ve kisve ve levâzım-ı zarûriyesine harc ü sarfa ve üçer guruşunu yedinde ibkāya ta‘ahhüd etmeğin mâ vaka‘a [bi’t-taleb ketb olundu] Fî 14 Z sene 1246 Şuhûdü’l-hâl: Eşrâf-ı kuzâtdan Ali Efendi, Muhzır Mehmed Ağa b. Ahmed, Kethüdâ-i muhzırân İsmail Ağa.