İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 154 Hüküm no: 123 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yuvan’ın uhdesindeki gedik hisselerini oğullarına sattığı Bakkāl Mahmiye-i İslambol hısnı ebvâbından Fener Kapısı dâhilinde mütemekkin Bakkāl Yuvan v. İstavri nâm zimmî tarafından husûs-ı âtîde ikrâr ve takrîre vekîl-i sâbitü’l-vekâlesi Ustabaşı İsak v. Kiryako nâm zimmî meclis-i şer‘-i hatîrde müvekkil-i mersûmun sulbî kebîr oğulları işbu hâmileyü’r-rakīm İstori ve Anaştaş zimmîler muvâcehelerinde bi’l-vekâle ikrâr-ı tâm ve takrîr-i kelâm edip müvekkilim mesfûr Yuvan zimmî mârru’z-zikr Fener kapısı dâhilinde kâin sürücü dükkânı denmekle arîf bir bâb ve yine civârında kâin Parmaksız dükkânı denmekle şehîr bir bâb ki cem‘an iki bâb bakkāl dükkânlarından zikri mürûr eden sürücü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yirmi sehmi âharın ve altmış üç sehmi oğlum mersûm İstori zimmînin ve on iki buçuk sehmi oğlum mesfûr Anaştaş zimmînin ve yirmi dört buçuk sehmi ile sâlifü’z-zikr Parmaksız dükkânı derûnunda mevcûde âlât-ı gediğin kezâlik yüz yirmi sehm i‘tibârıyla altmış dört sehmi yine oğlum mersûm İstavri zimmînin ve yirmi altı sehmi oğlum mersûm Anaştaş zimmînin ve yedi sehmi âharın ve yirmi üç sehmi yine benim akd-i âti’z-zikrin sudûruna değin yedimizde mülkümüz olmağla ben zikrleri sebkat eden âlât-ı gedik-i mezkûrelerden ber-minvâl-i muharrer mâlik olduğum hisse-i mezkûrelerimi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile oğullarım mersûmân İstori ve Anaştaş zimmîlere ale’l-iştirâk bin guruşa bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr bin guruşu yedlerinden tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d hisse-i mezkûrelerde benim aslâ ve kat‘â alâka ve medhalim kalmayıp oğullarım müşteriyân-ı mersûmânın mülk-i müşterâları ve hakk-ı sırfları olmuşdur dedi dedikde gıbbe’t-tasâduki’ş-şer‘î [mâ vaka‘a bi’t-taleb ketb olundu] Fî 17 Z sene 1246 Şuhûdü’l-hâl: Pazarbaşı Süleyman Ağa, Yiğitbaşı Molla Abdi, Molla Hüseyin b. Yusuf. Ustabaşı Ananosti, Kabzımâl Sava, Yazıcı [Filibos]