İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 155 Hüküm no: 124 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakof v. Yuvan’ın uhdesinde bulunan simitçi gediğini Abdulkadir b. Hüseyin ve arkadaşlarına sattığı Çörekçi Âsitâne-i aliyye’de vâki‘ simitçi esnâfından Yakof v. Yuvan nâm zimmî meclis-i şer‘-i hatîrde esnâf-ı mezkûreden işbu bâ‘isü’l-vesîka Abdülkadir b. Hüseyin ve diğer Hüseyin b. âhar Hüseyin ve Ahmed b. İbrahim nâm kimesneler ile Nano v. Koço nâm zimmî muvâcehelerinde ikrâr-ı tâm ve takrîr-i kelâm edip mahmiye-i mahkiye hısnı ebvâbından Balat kapısı dâhilinde hamam külhanı karşısında kâin ma‘lûmü’l-hudûd bir bâb çörekçi fırını derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin yüz yirmi sehm i‘tibârıyla müstakıllen yedimde mülküm olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūmûn Abdülkadir ve Hüseyin ve Ahmed ile Nano zimmîye otuzar sehm i‘tibâr kılınarak ale’l-iştirâk on üç bin guruşa bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i meşrûh iştirâ ve temellük ve tesellüm ve kabz ve kabûl eylediklerinden sonra semen-i mezkûr on üç bin guruşu müşteriyyûn-ı merkūmûn yedlerinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik fî-mâ ba‘d gedik-i mezkûrda benim aslâ ve kat‘â alâka ve medhalim kalmayıp müşteriyyûn-ı merkūmûn Abdülkadir ve Hüseyin ve Ahmed ile Nano zimmînin iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 23 Z sene 1246 Şuhûdü’l-hâl: Kethüdâ Mehmed Sadık Ağa, Yiğitbaşı İsmail Usta, Tahtakaleli İsmail Usta, Tahtakaleli es-Seyyid Hüseyin Usta, Sultanhamamı’nda es-Seyyid Hüseyin Usta.