İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 156 Hüküm no: 125 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi Hasan’ın uhdesindeki gedik hisselerinden bir kısmını Osman b. Sadık’a sattığı Çörekçi Âsitâne-i aliyye’de vâki‘ simitçi esnâfından Hasan b. Ali meclis-i şer‘-i münîrde esnâf-ı mezkûreden işbu bâ‘isü’l-vesîka Osman b. Sadık mahzarında ikrâr-ı tâm ve takrîr-i kelâm edip mahmiye-i mahkiyede Hocapaşa mahallesinde hamam ittisâlinde vâki‘ ma‘lûmü’l-hudûd bir bâb simitçi fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuzar sehmi gāibân ani’l-meclis Tahir ve İbrahim ustalarının (ustaların) ve altmış sehmi akd-i âti’z-zikrin sudûruna değin benim yedimizde mülkümüz olmağla ben ber-minvâl-i muharrer mâlik olduğum altmış sehm hisse-i mezkûremin otuz sehmini yedimde ibkā ve mâ‘adâ otuz sehmini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ merkūm Osman’a 3750 [24a] üç bin yedi yüz elli guruşa bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip semen-i mezkûr üç bin yedi yüz elli guruşu müşteri-i merkūm Osman bana tamâmen def‘ ü teslîm ve ben dahi yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik fî-mâ ba‘d gedik-i mezkûrda olan altmış sehm hissemin otuz sehminde benim aslâ ve kat‘â alâka ve medhalim kalmayıp müşteri-i merkūm Osman’ın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 23 Z sene 1246 Şuhûdü’l-hâl: Eş-şâhidûnü’s-sâbikūn.