İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 156 Hüküm no: 126 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’un sahibi olduğu gedik hissesini Emine Hatun’a sattığı Çörekçi Mahmiye-i İstanbul’da Karagümrüğü kurbünde Hadice Sultan mahallesinde sâkine ve zâtı zeyl-i vesîkada mektûbü’l-esâmî Müslimîn ta‘rîfleriyle mu‘arrefe Fâtıma bt. Mehmed nâm hatun meclis-i şer‘-i enverde mahmiye-i mezkûrede İskender mahallesi sâkinelerinden işbu bâ‘isetü’l-vesîka kezâlik zâtı mu‘arrefe Emine Hatun bt. Ahmed mahzarında ikrâr-ı tâm ve takrîr-i kelâm edip mârru’z-zikr Karagümrüğü kurbünde Dörtyolağzı nâm mahâlde turşucu dükkânı ittisâlinde kâin bir bâb simitçi ve çörekçi dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Hüseyin Usta’nın ve ma‘adâ altmış sehmi akd-i âti’z-zikrin sudûruna değin benim bâ-hüccet-i şer‘iye yedimizde iştirâken mülkümüz olmağla gedik-i mezkûrdan ber-minvâl-i muharrer mâlike olduğum altmış sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ merkūme Emine Hatun’a sekiz yüz kırk guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr sekiz yüz kırk guruşu müşteriye-i merkūme yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fî-mâ ba‘d gedik-i mezkûrun altmış sehm hissesinde benim aslâ ve kat‘â alâka ve medhalim kalmayıp müşteriye-i merkūme Emine Hatun’un mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 25 Z sene 1246 Şuhûdü’l-hâl: Eş-şâhidûnü’s-sâbikūn.