İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 157 Hüküm no: 127 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abiloğlu Ömer’in uhdesindeki manav gediği hissesini Mehmed Emin ile Eftat v. İspir’e sattığı Manav gediği Âsitâne-i aliyye’de vâki‘ manav esnâfından Abiloğlu Ömer b. Mehmed nâm kimesne meclis-i şer‘-i münîrde işbu bâ‘iseyü’l-vesîka Mehmed Emin b. Hasan nâm kimesne ile Eftat v. İspir nâm zimmî mahzarlarında ikrâr-ı tâm ve takrîr-i kelâm edip mahmiye-i mahkiyede Kapan-ı dakīk kapısı hâricinde vâki‘ ma‘lûmü’l-hudûd bir bâb manav dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz altmış bir sehm i‘tibârıyla yirmi bir sehmi Saide Hanım’ın ve on yedi sehmi Mehmed Tahir’in ve altmış bir sehmi es-Seyyid İbrahim’in ve altmış bir sehmi akd-i âti’z-zikrin sudûruna değin benim yedimizde iştirâken mülkümüz olmağla ben ber-minvâl-i muharrer mâlik olduğum altmış bir sehm hisse-i mezkûremi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ merkūmân Mehmed Emin ile mersûm Eftat zimmîye ale’l-iştirâk iki bin guruşa bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i meşrûh iştirâken iştirâ ve temellük ve tesellüm ve kabz ve kabûl eylediklerinden sonra semen-i mezkûr iki bin guruşu müşteriyân-ı mezbûrân yedlerinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fî-mâ ba‘d gedik-i mezkûrda olan hissemde benim aslâ ve kat‘â alâka ve medhalim kalmamışdır dedikde gıbbe’t-tasdîki’ş-şer‘î mâ vaka‘a [bi’t-taleb ketb olundu] Fî 16 Z sene 1246 Şuhûdü’l-hâl: Ali Ağa b. el-Hâc Mehmed, Molla Halil b. Süleyman, Molla Hüseyin b. Yusuf, Bölükbaşı İbrahim Edhem Ağa.