İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 158 Hüküm no: 128 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryako v. Mayil’in manav gediğini Kosti v. Anaştaş’a sattığı Manav gediği Âsitâne-i aliyye’de vâki‘ manav esnâfından Kiryako v. Mayil nâm zimmî meclis-i şer‘-i hatîrde işbu hâmilü’s-sifr Kosti v. Anaştaş zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin bâ-hüccet yedimde mülküm olup İstanbul hısnı ebvâbından Kumkapı hâricinde yağhâne ve manav dükkânı beynlerinde kâin mâhiye beşer guruş kirâ-i kadîmeli bir bâb manav dükkânı derûnunda mevcûde esnâfımız beyninde gedik ta‘bîr olunur âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile [24b] <> mersûm Kostandi zimmîye bin beş yüz guruşa bi-safkatin vâhidetin bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin beş yüz guruşu müşteri-i mersûm yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt etmemizle fî-mâ ba‘d gedik-i mezkûrda benim aslâ ve kat‘â alâka ve medhalim kalmayıp mersûm Kosti zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 19 Z sene 1246 Şuhûdü’l-hâl: Eş-şâhidûnü’s-sâbıkūni’l-müslimûn. Ustabaşı Yuvan, Anaştaş v. Anaştaş Yuvan v. Sava.