İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 158 Hüküm no: 129 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Markaro’nun gediğini Yako v. Musa’ya sattığı Yahûdi bakkāl Âsitâne-i aliyye’de vâki‘ Yahûdi bakkāl tâifesinden Markaro v. Yuda nâm Yahûdi meclis-i şer‘-i hatîrde yine tâife-i merkūmeden işbu hâmilü’r-rakīm Yako v. Musa nâm Yahûdi muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Balat kapısı dâhilinde Dörtyolağzı nâm mahâlde tütüncü dükkânı ittisâlinde kâin Samurkaş dükkânı denmekle arîf bir bâb Yahûdi bakkāl dükkânı derûnunda mevcûde yüz yirmi sehm i‘tibârıyla beyne’l-esnâf gedik ta‘bîr olunur akd-i âti’z-zikrin sudûruna değin müstakıllen yedimde emvâlim olan bir kantar ve bir terâzî ma‘a derâhim ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Yako Yahûdiye bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin guruşu bana tamâmen def‘ ü teslîm ve ben dahi yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik ba‘de’l-yevm dükkân-ı mezkûr derûnunda mevcûde gedik ta‘bîr olunan âlât-ı lâzıme-i muharrere-i mezkûre mesfûr Yako Yahûdinin emvâl-i müşterâtı ve hakk-ı sırfı olup benim aslâ ve kat‘â alâka ve medhalim kalmamışdır dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 21 Z sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Çâryekbaşı Buhanan v. Mayer, Musa v. Yasef, diğer Musa v. Sinto.