İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 159 Hüküm no: 130 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Toma’nın uhdesindeki bakkal gediği hissesini torunlarına sattığı Bakkāl Fi’l-asl Âsitâne-i aliyye’de vâki‘ bakkāl ve hâlâ balıkçı tâifesinden Toma v. Yuvan nâm zimmî meclis-i şer‘-i hatîrde sulbiye-i kebîre kızı Pofriye Nasrâniyenin sulbî kebîr oğulları işbu bâ‘isü’s-sifr Yuvan ve Kaplan ve İsteryos evlâd-ı Ananya nâm zimmîler taraflarından husûs-ı âtîde tasdîka vekîl-i şer‘îleri Ustabaşı Filibos v. Nikola nâm zimmî muvâcehesinde ikrâr-ı tâm ve takrîr-i kelâm edip mahmiye-i mezkûrede Taşkasab kurbünde kâin Ali Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla kırk sehmi Pirinççi Boşnak Mehmed Ağa’nın ve kırk sehmi işbu hâzır bi’l-meclis Sava zimmînin ve mâ‘adâ kırk sehmi dahi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olmağla ben gedik-i mezkûrdan ber-minvâl-i muharrer mâlik olduğum kırk sehm hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ torunlarım müvekkilûn-ı mersûmûna iki bin guruşa bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semen-i mezkûr iki bin guruşu torunlarım müşteriyyûn-ı mersûmûn yedlerinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fî-mâ ba‘d gedik-i mezkûrun ber-minvâl-i muharrer mâlik olduğum kırk sehm hissesinde benim aslâ ve kat‘â alâka ve medhalim kalmayıp müşteriyyûn-ı müvekkilûn-ı mersûmûnun mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 26 Z sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Yazıcı Yani, Kabzımâl Sava, Ustabaşı Vasil, Ustabaşı İsak.