İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 160 Hüküm no: 131 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkçı Toma’nın uhdesindeki bakkal gediği hissesini kızına sattığı Bakkāl Fi’l-asl Âsitâne-i aliyye’de vâki‘ bakkāl ve hâlâ balıkçı tâifesinden Toma v. Yuvan nâm zimmî meclis-i şer‘-i hatîrde sulbiye-i kebîre kızı işbu bâ‘isetü’s-sifr Pofriye Nasrâniye tarafından husûs-ı âtîde tasdîka vekîl-i sâbitü’l-vekâlesi Ustabaşı Filibos v. Nikola muvâcehesinde ikrâr-ı tâm ve takrîr-i kelâm edip mahmiye-i mahkiyede Haseki çarşısında vâki‘ Ramazan Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf âlât-ı lâzıme-i ma‘lûmenin yüz yirmi sehm i‘tibârıyla yüz dokuz sehmi âharın ve mâ‘adâ on bir sehmi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olmağla ben gedik-i mezkûrdan ber-minvâl-i muharrer mâlik olduğum on bir sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ kızım müvekkile-i mersûme Pofriye Nasrâniyeye beş yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr beş yüz guruşu kızım müşteriye-i müvekkile-i mersûm Pofriye Nasrâniye bana def‘ ü teslîm ve ben dahi yedinden tamâmen ve kâmilen ahz ü [25a] kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik fî-mâ ba‘d gedik-i mezkûrun ber-minvâl-i muharrer mâlik olduğum on bir sehm hissesinde benim aslâ ve kat‘â alâka ve medhalim kalmayıp kızım <> müşteriye-i müvekkile-i mersûm Pofriye Nasrâniyenin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 26 Z sene 1246 Şuhûdü’l-hâl: Eş-şâhidûnü’s-sâbikūn.