İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 164 Hüküm no: 134 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Limnili Hüseyin Ağa’nın gediğini Mehmed Bektaş Ağa’ya sattığı Tütüncü mübâya‘ası Mahrûse-i Galata’ya muzâfe kasaba-i Beşiktaş’da Süleymaniye mahallesinde sâkin Limnili Hüseyin Ağa b. Osman meclis-i şer‘-i şerîf-i enverde zahîreci esnâfından işbu bâ‘isü’l-kitâb Mehmed Bektaş Ağa b. İbrahim mahzarında ikrâr-ı tâm ve takrîr-i kelâm edip mahmiye-i İstanbul’da Duhân Gümrüğü kurbünde Zahîreciler sûkunda hasırcı dükkânı ittisâlinde kâin beher mâh dört guruş kirâ-i kadîmeli mukaddemâ zahîreci ve pirinççi dükkânı ve gediği olup el-yevm bir bâb tütüncü dükkânı derûnunda mevcûde beyne’l-esnâf gedik ta‘bîr olunur bir peşkûn ve bir billûr kâse ve bir havlu ve bir terâzî ma‘a derâhim ve bir kantar ve sâir âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye müstakıllen yedimde mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mehmed Bektaş Ağa’ya dokuz yüz elli guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip semen-i mezkûr dokuz yüz elli guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz <> etmemle mebî‘-i mezkûrun tağrîr ve <> gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d âlât-ı gedik-i muharrere-i mezkûrede benim aslâ ve kat‘â alâka ve medhalim kalmayıp müşteri-i merkūm Mehmed Bektaş Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 28 [Zilhicce] sene 1246 Şuhûdü’l-hâl: Kethüdâ Mustafa Kâşif Ağa, Vekîl Ünyeli Mehmed Ağa, Kâtib Mehmed Efendi, Yiğitbaşı Hafız Ahmed Ağa, Odacı Yusuf Çelebi ve gayruhum.