İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 165 Hüküm no: 135 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü İstefan’ın uhdesindeki tütüncü gediğini Hayharum Lambik’e sattığı Tütüncü Mahmiye-i İstanbul hısnı ebvâbından Langa yenikapısı hâricinde Yenimahalle’de mütemekkin Tütüncü İstefan v. Minas nâm zimmî meclis-i şer‘-i hatîrde esnâf-ı mezkûreden işbu hâmiliyyü’r-rakīm Hayharum Lambik v. Şahbaz [ve] Dimitri nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Kapan-ı dakīkkapısı dâhilinde Emirhan’ı ve kasab dükkânı beynlerinde kâin beher mâh altı guruş kirâ-i kadîmeli bir bâb tütüncü dükkânı derûnunda mevcûde Ma‘den Kalemi’nde benimle er karındaşım Kirkor zimmî ismimize mukayyed ve mu‘teber beyne’l-esnâf gedik ta‘bîr olunur bir peşkûn ve bir billûr kâse ve iki hûni ve bir terâzî ma‘a derâhim ve bir kantar ve sâir âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye müstakıllen yedimde mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Hayharum Lambik zimmîye iki bin beş yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin beş yüz guruşu bana tamâmen def‘ ü teslîm ve ben dahi yedinden ahz u kabz <> etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm <> ile ibrâ ve iskāt eyledik fî-mâ ba‘d âlât-ı gedik-i muharrere-i mezkûrede benim aslâ ve kat‘â alâka ve medhalim kalmayıp müşteri-i mersûm Hayharum Lambik zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 28 Z sene 1246 Şuhûdü’l-hâl: Eş-şâhidûnü’s-sâbikūn.