İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 166 Hüküm no: 136 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Rifat Ağa’nın uhdesindeki arsa hissesini Mehmed Numan Efendi’ye sattığı Zincirlikuyu kurbünde arsa mübâya‘ası Havâss-ı refî‘a kazâsına muzâfe Kâğıdhâne karyesinde sâkin Kısmet-i Askeriye Mahkemesi muhzırânından müteveffâ el-Hâc Abdi Ağa’nın sulbî kebîr oğlu Ahmed Rifat Ağa meclis-i şer‘-i şerîf-i enverde mahkeme-i mezkûre ketebesinden işbu bâ‘isü’l-kitâb Mehmed Numan Efendi b. Mehmed mahzarında ikrâr-ı tâm ve takrîr-i kelâm edip Mahmiye-i İstanbul’da Zincirlikuyu kurbünde Atîkalipaşa mahallesinde vâki‘ bir tarafdan Defterdâr-ı esbak merhûm Seyfullah Efendi Vakfı’ndan Hasan Ağa ve zevcesi Şerife Zeliha Hatun uhdelerinde olan menzil ve bahçeleri ve bir tarafdan Ahmed Paşa Vakfı mülhakātından merhûme Fâtıma Hatun Vakfı’ndan merkūm Numan Efendi’nin uhdesinde olan menzili bahçesi ve ba‘zen yine vakf-ı mezkûreden Derviş Mehmed uhdesinde olan arsa ve ba‘zen yine vakf-ı mezkûrdan Koltukçu es-Seyyid Mustafa Ağa menzili ve ba‘zen Haremeynü’ş-şerifeyn [26b] vakfından Derviş Osman menzili bahçesi ve bir tarafdan Uzun Yusuf Paşa Vakfı’ndan Suyolcu es-Seyyid Yusuf Ağa uhdesinde olan arsa ve ba‘zen Haremeynü’ş-şerifeyn vakfından Azize Hatun menzili ve bir tarafdan tarîk-i âm ile mahdûd külâhçılar odaları denmekle arîf tûlen ve arzen bi-hesâbı terbî‘i bin yedi yüz kırk zirâ‘ altı bâb muhterik menzil arsasının merkūme Azize Hatun menzili tarafından dört yüz zirâ‘ mahâlli Şeyhülislâm-ı esbak merhûm Mirzâde es-Seyyid Mehmed Said Efendi ve ittisâlinde vâki‘ iki yüz doksan bir zirâ‘ on sekiz parmak mahâlli dahi Kâmetîzâde kerîmesi Fâize Âişe Hatun vakıflarından merkūm Mehmed Numan Efendi’nin bi’l-icâreteyn uhde-i tasarrufunda ve mâ‘adâ bin kırk sekiz zirâ‘ altı parmak mahâlli dahi akd-i âti’z-zikrin sudûruna değin vâlidesi müteveffât Havva bt. İbrahim’den mevrûs yedimde mülküm olmağla ben ber-minvâl-i muharrer mâlik olduğum mahâll-i mezkûru tarafeynden îcâb ve kabûlü hâvî şurût-ı müfsideden ve muvâza‘adan [ârî] bey‘-i bâtt-ı sahîh-i şer‘î ile merkūm Mehmed Numan Efendi’ye yüz elli guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr yüz elli guruşu merkūm Mehmed Numan Efendi bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika da‘vâdan ben merkūm Mehmed Numan Efendi’nin zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledim ba‘de’l-yevm mahâll-i memlûk-i mezkûrda benim aslâ ve kat‘â alâka ve medhalim kalmayıp müşteri-i merkūm Mehmed Numan Efendi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ vaka‘a [bi’t-taleb ketb olundu] Fî 24 Zilka‘de sene 1246 Şuhûdü’l-hâl: Kethüdâ-i muhzırân İsmail Ağa Odacı Yusuf Çelebi, Çukadâr Ali Ağa, tâbi‘...