İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 167 Hüküm no: 137 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın boşandığı hanımı ile sulh olduğu 1500 guruşa sulh Mahrûse-i Galata’ya muzâfe kasaba-i Kasımpaşa’da Câmi‘-i kebîr mahallesinde sâkin kasab esnâfından es-Seyyid Mustafa Ağa b. es-Seyyid Ömer meclis-i şer‘-i şerîf-i enverde kendi nefsinden asıl ve medîne-i Hazret-i Ebâ Eyyûbe’l-Ensârî -radiye anhu Rabbihi’l-Bârî’de- Yâvedûd mahallesinde sâkine mezbûr es-Seyyid Mustafa Ağa’nın zevce-i mutallıkası işbu bâ‘isetü’l-vesîka Havva bt. Abdullah b. Abdurrahman tarafından husûs-ı âti’l-beyânda vekîl olduğu zâtını ârifân Kasab Halil b. Ali ve Kasab Feyzullah b. İsmail nâm kimesneler şehâdetleriyle sâbit olan Eğrikapı Kasablar Kethüdâsı el-Hâc İbrahim Ağa b. Abbas mahzarında ikrâr-ı tâm ve takrîr-i kelâm edip müvekkile-i mezbûre Havva Hatun zevce-i menkûha-i medhûlün-bihâm iken bundan akdem hîn-i mufârakatimizde mahalle-i mezkûrede kâin ma‘an sâkinler olduğumuz menzili derûnunda mevcûde mâlımdan bâ-defter-i müfredât ma‘lûmü’l-mikdâr kıymetli eşyâ-i ma‘lûmemi müvekkile-i mezbûre Havva Hatun fuzûlî ve bi-gayr-ı hakkın alıkoyup zabt etmekle eşyâ-i mezkûre mevcûde ise aynılarını ve müstehleke ise bi’s-sübût kıymetlerini müvekkile-i mezbûre Havva Hatun’dan taleb ve da‘vâya tasaddî etmişidim el-hâletü hâzihî bâ-tavassut-ı muslihîn beynimiz ıslâh ve tevfîk olunup ben ber-minvâl-i muharrer tasaddî eylediğim da‘vâ-yı mezkûremden müvekkile-i mezbûre Havva Hatun ile kat‘an-li’n-nizâ‘ bin beş yüz guruş bedel-i medfû‘ ve makbûza bi’t-terâzî sulh olduğumda ol dahi bi’l-vekâle sulh-ı mezkûru kabûl ve benden ma‘lûmü’r-ruûs ganem semeninden gayr-ı ez-teslîm bi’l-asâle mutâlebe eylediği bin dokuz yüz kırk altı guruş on para müdde‘âsından bi’t-terâzî meccânen fâriğ oldukdan sonra bi’l-cümle husûs-ı mezkûrlara ve merkūm el-Hâc İbrahim Ağa’nın bâ-hüccet-i şer‘iye vasîsi olduğu sagīr es-Seyyid Mehmed’in babası müteveffâ el-Hâc Ali’ye hayatında Hadice Sultan Vakfı musakkafâtından mahalle-i mezkûrede kâin bi’l-icâreteyn mutasarrıf olduğum bir bâb menzilimi ma‘lûmü’l-mikdâr deynim mukābelesinde vefâ’en ferâğ eylediğimden sonra merkūm el-Hâc Ali fevt oldukda menzil-i mezkûr sagīr-i mezbûra âdiyen intikāl etmek üzere merkūm el-Hâc İbrahim Ağa menzil-i mezkûru bi’l-vesâye âhara ferâğ etmiş olmağla menzil-i mezkûra ve işbu târîh-i kitâba gelince beynimizde cereyân eden husûsât-ı sâire-i şer‘iyeye müte‘allika âmme-i de‘âvî ve kâffe-i mutâlebâtdan ben müvekkile-i mezbûre Havva Hatun ve vekîl-i merkūm el-Hâc İbrahim Ağa ile vasîsi olduğum sagīr-i mezbûr es-Seyyid Mehmed’in zimmetlerini ibrâ-i âmm-ı sahîh-i şer‘î ile ibrâ ve iskāt eylediğimde ol dahi kezâlik husûs-ı mezkûra ve târîh-i mezkûra gelince cemî‘ hukūk-ı şer‘iyeye müte‘allika âmme-i da‘vâdan benim zimmetimi bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt ve tarafeynden her birimiz ber-minvâl-i meşrûh âharın ibrâsını asâleten ve vekâleten kabûl eyledik dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 18 Z sene 1246 Şuhûdü’l-hâl: Yedikule Kasablar Kethüdâsı el-Hâc Hasan Ağa b. el-Hâc Osman, Odacı Hüseyin Çelebi b. Yusuf, Kethüdâ-i muhzırân İsmail Ağa b. Mustafa.