İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 168 Hüküm no: 138 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber gediği satışı Berber Âsitâne-i aliyye’de vâki‘ berber esnâfından Mehmed b. İbrahim nâm kimesne savb-ı şer‘-i enverden mezûnen irsâl olunan Başkâtib eşrâf-ı kuzâtdan mevlânâ İbrahim Ârif Efendi’nin [Efendi] mahmiye-i İstanbul hısnı ebvâbından Ahırkapı hâricinde vâki‘ Berber es-Seyyid Hasan Ağa b. Mehmed’in dükkânında huzûr-ı Müslimînde akdeylediği meclis-i şer‘de hademe-i hâssadan Muzika Onbaşısı işbu bâ‘isü’l-vesîka Mehmed b. Memiş nâm kimesne mahzarında ikrâr-ı tâm ve takrîr-i kelâm edip mahmiye-i mezbûrede Sultan Ahmed Han -aleyhi rahmetü ve’l-gufrân- hazretleri câmi‘-i şerîfi civârında Kemeraltı nâm mahâlde kâin Başmuhâsebe’de Berber Ali Usta ismine mukayyed ve mu‘teber âhar akāra tebdîl olunan bir bâb berber dükkânı derûnundan müstahlas beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye müstakıllen yedimde emvâlim olan beş ustura ve bir kayış ve bir mir’ât ve bir bileği taşı ve sâir âlât-ı lâzıme-i ma‘lûmenin nısf-ı şâyi‘ini yedimde ibkā ve nısf-ı şâyi‘-i âharını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Mehmed’e altı yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr altı yüz guruşu müşteri-i merkūm [27a] Mehmed bana def‘ ü teslîm ben dahi yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik ba‘de’l-yevm âlât-ı lâzıme-i müstahlasa-i muharrere-i mezkûrenin nısf-ı şâyi‘i mezbûr Mehmed’in emvâl-i müşterâtı ve hakk-ı sırfı olup benim nısf-ı şâyi‘inde kat‘â alâka ve medhalim kalmamışdır dedikde gıbbe’t-tasdîki’ş-şer‘î vâki‘ hâli mevlânâ-yı <> mûmâ-ileyh mahâllinde ketb ü tahrîr ve ma‘an meb‘ûs ümenâ-i şer‘den Çukadâr Mehmed Halid Ağa b. Ahmed ve Muhzır Mustafa Çelebi b. Hüseyin ile meclis-i şer‘-i şerîfe gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu. Fî 5 min-Zilka‘deti’ş-şerîfe sene 1246 Şuhûdü’l-hâl: Hamalân Kethüdâsı Ahmed Ağa b. Mustafa, Berber Mehmed Nuri Usta b. Mehmed Emin, Köşe Ustası Ahmed Ağa b. Hüseyin.