İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 169 Hüküm no: 139 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi v. Todori’nin uhdesindeki bakkal gediği hissesini hanımı, damadı ve torununa sattığı Bakkāl Âsitâne-i aliyye’de vâki‘ bakkāl tâifesinden Kostandi v. Todori nâm zimmî meclis-i şer‘-i hatîrde işbu hâmilü’s-sifr zevcesi Çiçeka bt. Kosti ve sulbiye-i kebîre kızı Marya Nasrâniyeler ile güveyi İstefor v. Hıristo nâm zimmî tarafından husûs-ı âtîde tasdîka vekîl-i şer‘îleri Ustabaşı Yuvakim v. Simyon nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Odunkapısı hâricinde keresteci ve yumurtacı dükkânları beynlerinde kâin İskender dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yirmi altı sehmi Zanya ve kırk sehmi Yuvan ve on beş sehmi Merkül ve on üç sehmi diğer İstefor zimmîlerin ve yirmi altı sehmi dahi akd-i âti’z-zikrin sudûruna değin benim yedimizde mülkümüz olmağla ben gedik-i mezkûrdan ber-minvâl-i meşrûh mâlik olduğum yirmi altı sehm hisse-i mezkûremin iki sehmini yedimde ibkā ve mâ‘adâ yirmi dört sehmin altı sehmini zevcem ve altı sehmini güveyim ve on iki sehmini kızım müvekkilûn-ı mersûmûn Çiçeka ve Marya Nasrâniyelere ve İstefor zimmîye tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müştereklerim mersûmûnun izn ü icâzetleriyle iki bin dört yüz guruşa ale’l-iştirâk bey‘ ü temlîk ve her birine vech-i lâyıkları üzere teslîm eylediğimde onlar dahi ber-minvâl-i meşrûh iştirâken iştirâ ve temellük ve tesellüm ve kabz ve kabûl eylediklerinden sonra semen-i mezkûr iki bin dört yüz guruşu yedlerinden tamâmen ve kâmilen ahz u kabz etmemle fî-mâ ba‘d gedik-i mezkûrda olan yirmi altı sehm hisse-i mezkûremin yirmi dört sehminde benim aslâ ve kat‘â alâka ve medhalim kalmayıp zevcem ve kızım ve güveyim müvekkilûn-ı mesfûrûnun emvâl-i müşterâtları ve hakk-ı sırfları olmağın ke-emsâlihim mâlik ve mutasarrıflar olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb ü imlâ olundu. Fî 28 Z sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi Kabzımâl Sava, Yazıcı Yani, Ustabaşı İsak, Ustabaşı Filibos.