İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 170 Hüküm no: 140 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Yani’nin uhdesindeki bakkal gediği hissesini Yorgi v. Sava’ya sattığı Bakkāl Âsitâne-i aliyye’de vâki‘ bakkāl tâifesinden Tanaş v. Yani nâm zimmî meclis-i şer‘-i münîrde yine tâife-i mersûmeden işbu hâmilü’r-rakīm Yorgi v. Sava zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Kapan-ı dakīk kapısı hâricinde Yemenîciler sûkunda kâin Yedekçi Mehmed Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yirmi sehmi mersûm Yorgi zimmînin ve elli yedi sehmi Venet zimmînin ve yirmi sehmi Aci Kostandi zimmînin ve on üç sehmi Yani veresesinin ve mâ‘adâ on sehmi dahi akd-i âti’z-zikrin sudûruna değin benim bâ-hüccet-i şer‘iye <> yedimizde iştirâken mülkümüz olmağla gedik-i mezkûrdan ben ber-minvâl-i muharrer mâlik olduğum on sehm hisse-i mezkûremi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Yorgi zimmîye bin yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin yüz guruşu müşteri-i mersûm Yorgi zimmî yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fî-mâ ba‘d gedik-i mezkûrun ber-minvâl-i muharrer mâlik olduğum on sehm hisse-i mezkûresinde benim aslâ ve kat‘â alâka ve medhalim kalmayıp müşteri-i mersûm Yorgi zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 28 Z sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı İsak, Ustabaşı Vasil, Kabzımâl Sava, Yazıcı Yani