İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 170 Hüküm no: 141 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstorina bt. Kostandi ve kardeşlerinin uhdelerindeki gedik hisselerini Mina ve Vasil’e sattıkları Bakkāl Vilâyet-i Anadolu’da Arabsun kazâsına tâbi‘ Sinesun karyesinde mütemekkineler İstorina bt. Kostandi ve Despino bt. Todori nâm Nasrâniyeler taraflarından husûs-ı âti’l-beyânda vekîlleri olduğu şahıslarını bilir Sarafim v. Yuvan ve İstavri v. Yuvan nâm zimmîler şehâdetleriyle ber-nehc-i şer‘î sâbit olan Bakkāl Yorgi v. Kiryanos nâm zimmî meclis-i şer‘-i hatîrde bakkāl tâifesinden işbu bâ‘isiyyü’s-sifr Mina v. Andon ve Vasil v. İlya nâm zimmîler muvâcehelerinde bi’l-vekâle ikrâr-ı tâm ve takrîr-i kelâm edip mahmiye-i mezbûrede Fener kurbünde Kiremit mahallesinde kâin kârgir dükkân denmekle arîf bir bâb ve civârında vâki‘ Kocakarı dükkânı denmekle meşhûr bir bâb ki cem‘an iki bâb bakkāl [27b] derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmişer sehmden iki yüz kırk sehm i‘tibârıyla altmışar sehmden yüz yirmi sehmi Aci Kostandi zimmînin ve mâ‘adâ altmışar sehmden yüz yirmi sehmi dahi akd-i âti’z-zikrin sudûruna değin müvekkilelerim mersûmetânın yedlerinde bâ-hüccet-i şer‘iye mülkleri olmağla gedik-i mezkûrlardan müvekkilelerim mersûmetânın ber-minvâl-i muharrer mâlik oldukları hisselerini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekleri mersûmun izniyle mersûmân Mina ve Vasil zimmîlere ale’l-iştirâk beş bin üç yüz guruşa bi’l-vekâle bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl edip semen-i mezkûr beş bin üç yüz guruşu bana tamâmen def‘ ü teslîm ve ben dahi yedlerinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ ve iskāt eyledik fî-mâ ba‘d gedik-i mezkûrların hisselerinde müvekkilelerim mersûmetânın aslâ ve kat‘â alâka ve medhalleri kalmayıp müşteriyân-ı mersûmânın mülk-i müşterâları ve hakk-ı sırfları olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 28 Z sene 1246 Şuhûdü’l-hâl: Eş-şâhidûnü’s-sâbikūn.